ភ្នំពេញ៖

ចាប់តាំងពីខែកក្កដា ឆ្នាំ២០២៦ មក អង្គការក្រុមការងារកម្ពុជាដើម្បីការអប់រំ (ស៊ីថេប) បានសហការជាមួយនាយកដ្ឋានតម្រង់ទិសវិជ្ជាជីវៈ (DVO) នៃក្រសួងអប់រំ យុវជន និងកីឡា (MoEYS) ដើម្បីអនុវត្តកម្មវិធីអប់រំស្ទែម (STEM) នៅតាមវិទ្យាល័យនានា។ បច្ចុប្បន្ន កម្មវិធីនេះកំពុងដំណើរការនៅក្នុងវិទ្យាល័យចំនួន ៩ ក្នុងខេត្តចំនួន ៨ ទូទាំងប្រទេសកម្ពុជា។

ពីការិយាល័យរបស់យើងនៅខេត្តសៀមរាប គ្រូបង្រៀន ស៊ីថេប ធ្វើដំណើរទៅកាន់សាលាដៃគូនានានៅតាមបណ្តាខេត្តផ្សេងៗ ចាប់ពីខេត្តរតនគិរីនៅភាគឦសាន រហូតដល់ខេត្តកោះកុងនៅភាគនិរតី។ ទោះបីជាការធ្វើដំណើរទាំងនេះមានចម្ងាយឆ្ងាយក៏ដោយ ប៉ុន្តែវាអាចជួយឱ្យយើងបាននាំយកការអប់រំបច្ចេកវិទ្យាទៅដល់សិស្សានុសិស្សកាន់តែច្រើនដោយផ្ទាល់។

នៅពីក្រោយមេរៀននីមួយៗ គឺជាដំណើរមួយដែលត្រូវឆ្លងកាត់។

ដើម្បីជៀសវាងការរំខានដល់កាលវិភាគសិក្សាធម្មតារបស់សិស្ស សាលាភាគច្រើនរៀបចំវគ្គបណ្តុះបណ្តាល ស្ទែម នៅចុងសប្តាហ៍។ គ្រូបង្រៀន ស៊ីថេប សហការជាមួយសាលានីមួយៗ និងធ្វើដំណើរទៅបង្រៀនដោយផ្ទាល់ ដោយសាលានីមួយៗទទួលបានការបណ្តុះបណ្តាលសរុបចំនួន ៤៨ ម៉ោង។

វគ្គសិក្សានេះរួមមាន ការសរសេរកូដ (Coding) ការរចនាក្រាហ្វិក (Graphic Design) ការអភិវឌ្ឍប្រព័ន្ធ (System Development) និងការជួសជុលកុំព្យូទ័រ (Computer Repair)។ សិស្សានុសិស្សមិនត្រឹមតែមានឱកាសសិក្សាអំពីបច្ចេកវិទ្យាប៉ុណ្ណោះទេ ប៉ុន្តែថែមទាំងអាចអនុវត្តចំណេះដឹងដែលទទួលបានជាក់ស្តែង អភិវឌ្ឍជំនាញដោះស្រាយបញ្ហា និងស្វែងយល់ពីរបៀបដែលបច្ចេកវិទ្យាអាចជួយគាំទ្រដល់ការសិក្សាបន្ត និងអាជីពរបស់ពួកគេនាពេលអនាគតផងដែរ។

ដូចដែលបានបង្ហាញនៅលើផែនទី សាលាដែលចូលរួមក្នុងកម្មវិធីនេះមានទីតាំងនៅតាមតំបន់ផ្សេងៗគ្នានៃប្រទេសកម្ពុជា។ សម្រាប់យើង គម្រោងនេះមិនមែនគ្រាន់តែជាការនាំយកថ្នាក់រៀនទៅកាន់ទីតាំងផ្សេងៗប៉ុណ្ណោះទេ ប៉ុន្តែគឺជាការបង្កើតឱកាសឱ្យសិស្សានុសិស្សនៅតាមសហគមន៍ផ្សេងៗ អាចអភិវឌ្ឍជំនាញបច្ចេកវិទ្យាជាក់ស្តែង និងស្វែងរកលទ្ធភាពថ្មីៗតាមរយៈការសិក្សារៀនសូត្រ។

យើងខ្ញុំសូមថ្លែងអំណរគុណចំពោះគ្រូបង្រៀនទាំងអស់ដែលបានខិតខំប្រឹងប្រែង និងបន្តបំពេញតួនាទីដោយការប្តេជ្ញាចិត្តខ្ពស់ ព្រមទាំងថ្លែងអំណរគុណដល់វិទ្យាល័យដែលបានចូលរួមទាំងអស់ និងនាយកដ្ឋានតម្រង់ទិសវិជ្ជាជីវៈ (DVO) ចំពោះការគាំទ្រ។ ស៊ីថេប នឹងបន្តសហការជាមួយដៃគូរបស់យើង និងស្វែងរកឱកាសដើម្បីពង្រីកកិច្ចសហការជាមួយសាលារៀនក្នុងតំបន់បន្ថែមទៀត ដើម្បីជួយឱ្យសិស្សានុសិស្សកម្ពុជាកាន់តែច្រើនទទួលបានចំណេះដឹង បទពិសោធន៍អនុវត្តជាក់ស្តែង និងជំនាញសម្រាប់អនាគតរបស់ពួកគេ។

ជាមួយគ្នានេះ យើងក៏សូមឆ្លៀតឱកាសចែករំលែករូបភាពទេសភាពដ៏ស្រស់ស្អាត និងតំបន់ទាក់ទាញពិសេសៗរបស់ប្រទេសកម្ពុជា ពីបណ្តាខេត្តដែលយើងបានធ្វើដំណើរទៅកាន់ផងដែរ។ សូមចូលរួមជាមួយយើង ដើម្បីស្វែងយល់ពីសម្រស់ធម្មជាតិ និងភាពសម្បូរបែបនៃវប្បធម៌នៅតាមតំបន់ផ្សេងៗនៃប្រទេសកម្ពុជា!

#ស៊ីថេប #ការអប់រំស្ទែម #ការអប់រំផ្នែកបច្ចេកវិទ្យា #កម្ពុជា

ភ្នំពេញ៖

ការអប់រំមិនមែនមានត្រឹមតែជាការបង្រៀនចំណេះដឹងតាមសៀវភៅសិក្សាប៉ុណ្ណោះទេ។

ក្នុងខែកញ្ញា អ្នកគ្រូម៉ា មកពីប្រទេសតៃវ៉ាន់ បានត្រឡប់មកកម្ពុជាជាលើកទី២ ដើម្បីចូលរួមការងារស្ម័គ្រចិត្ត មកបង្រៀនសិស្សនៅមណ្ឌលសិក្សាស្ទឹងព្រះស្រុកអស់រយៈពេលមួយខែ ។ ក្នុងរយៈពេលមួយខែ​ អ្នកគ្រូបានខិតខំបង្រៀនកូនសិស្ស​ ដោយយកចិត្តទុកដាក់អស់ពីកម្លាំងកាយចិត្ត និងជំនាញរបស់អ្នកគ្រូបានផ្តល់ឱកាសឱ្យសិស្សទទួលបានបទពិសោធន៍ការសិក្សាផ្សេងៗ ស្វែងរកចំណាប់អារម្មណ៍របស់ខ្លួន បង្កើនទំនុកចិត្ត និងមានអារម្មណ៍ថាពួកគេត្រូវបានយកចិត្តទុកដាក់ពីអ្នកគ្រូ។

សូម្បីតែមុនពេលមកដល់ប្រទេសកម្ពុជា អ្នកគ្រូម៉ាបានចំណាយពេលយ៉ាងច្រើនក្នុងការរៀបចំមេរៀន និងសម្ភារៈសិក្សាសម្រាប់សិស្ស។ អ្នកគ្រូបាននាំយកខ្លុយចំនួន ៩០ ដើម ពីប្រទេសតៃវ៉ាន់មកដោយផ្ទាល់ ដើម្បីឱ្យសិស្សប្រើប្រាស់ក្នុងថ្នាក់រៀន។ អ្នកគ្រូក៏បានប្រមូលវីតាមីនចម្រុះ ពីប្រទេសតៃវ៉ាន់ ​បន្ទាប់មកត្រូវបានបរិច្ចាគជូនដល់អាជ្ញាធរសុខាភិបាលក្នុងស្រុក ដើម្បីចែកចាយទៅតាមតម្រូវការរបស់សហគមន៍។ តាមរយៈនេះ ការយកចិត្តទុកដាក់របស់អ្នកគ្រូអាចឈានទៅដល់មនុស្សកាន់តែច្រើនដែលកំពុងត្រូវការជំនួយ។

ការសិក្សាតន្ត្រី និងភាសា

អ្នកគ្រូម៉ាបានបង្រៀនសិស្សពីរបៀបលេងខ្លុយ និងច្រៀងបទចម្រៀងកុមារងាយៗ។ តាមសំណើរបស់គ្រូក្នុងមណ្ឌលសិក្សាស្ទឹងព្រះស្រុក អ្នកគ្រូក៏បានបង្រៀនភាសាចិនដល់សិស្ស ដោយបង្រៀនពាក្យ និងឃ្លាសាមញ្ញៗ។

តាមរយៈការសិក្សាតន្ត្រី និងភាសា សិស្សមិនត្រឹមតែទទួលបានជំនាញថ្មីៗប៉ុណ្ណោះទេ ប៉ុន្តែពួកគេក៏មានឱកាសអភិវឌ្ឍការផ្តោតអារម្មណ៍ ការស្តាប់ និងការធ្វើទំនាក់ទំនងផងដែរ។

សិល្បៈ សិប្បកម្ម និងការច្នៃប្រតិដ្ឋ

អ្នកគ្រូម៉ាក៏បានរៀបចំសកម្មភាពសិល្បៈ និងសិប្បកម្មជាច្រើន ដូចជា ការគូររូប ការកាត់ក្រដាស និងការបត់ក្រដាស ដើម្បីលើកទឹកចិត្តឱ្យសិស្សប្រើប្រាស់ការស្រមើស្រមៃ និងបង្កើតស្នាដៃដោយដៃរបស់ពួកគេផ្ទាល់។

ទោះបីសកម្មភាពទាំងនេះមើលទៅសាមញ្ញក៏ដោយ ប៉ុន្តែវាត្រូវការពេលវេលា និងការរៀបចំយ៉ាងយកចិត្តទុកដាក់។ សម្រាប់សិស្ស សកម្មភាពទាំងនេះបានផ្តល់ឱកាសឱ្យពួកគេ ក្នុងការរៀនសូត្រ ការច្នៃប្រតិដ្ឋ បង្កើតស្នាដៃ និងបង្ហាញពីសមត្ថភាពរបស់ខ្លួនតាមរបៀបផ្សេងៗ។

ការយកចិត្តទុកដាក់ចំពោះសុខភាព និងអាហារូបត្ថម្ភរបស់សិស្ស

ក្រៅពីសកម្មភាពក្នុងថ្នាក់រៀន អ្នកគ្រូម៉ាក៏បានយកចិត្តទុកដាក់ចំពោះអាហារូបត្ថម្ភរបស់សិស្សផងដែរ។ ពីរដងក្នុងមួយខែ អ្នកគ្រូបានរៀបចំស៊ុតស្ងោរ ដែលជាអាហារសម្រន់មានជីវជាតិ សម្រាប់ផ្តល់ជូនសិស្សក្នុងអំឡុងពេលរៀន។

ចាប់ពីខែកញ្ញា ដល់ខែកុម្ភៈ មានសិស្សសរុបចំនួន ៤២៧ នាក់​ ដែលបានទទួលអាហារូបត្ថម្ភស៊ុតស្ងោរពីអ្នកគ្រូម៉ា ។

សម្រាប់សិស្ស ស៊ុតស្ងោរមួយគ្រាប់ មេរៀនមួយ ឬស្នាដៃធ្វើសិប្បកម្មដោយដៃ អាចក្លាយជាបទពិសោធន៍ដែលមានអត្ថន័យ និងអនុស្សាវរីយ៍ដែលពួកគេចងចាំបានយូរ។

ស្នាមញញឹមរបស់កុមារ បានបង្ហាញឱ្យយើងឃើញថា ពួកគេពិតជាទទួលបានការយកចិត្តទុកដាក់ និងភាពកក់ក្តៅពីអ្នកគ្រូម៉ា។

សូមថ្លែងអំណរគុណអ្នកគ្រូម៉ា ដែលបានត្រឡប់មកកម្ពុជា

ក្នុងអំឡុងពេលមួយខែនេះ អ្នកគ្រូម៉ាមិនត្រឹមតែ បង្រៀនសិស្ស ប៉ុណ្ណោះទេ អ្នកគ្រូបានចំណាយពេល កម្លាំងកាយចិត្ត និងធនធានផ្ទាល់ខ្លួន ដើម្បីរៀបចំមេរៀន សម្ភារៈសិក្សា និងសម្ភារៈប្រើប្រាស់សម្រាប់សិស្ស ហើយថែមទាំងបាននាំយកសម្ភារៈជាច្រើនពីប្រទេសតៃវ៉ាន់មកកម្ពុជាដោយផ្ទាល់។

ចាប់ពីខ្លុយចំនួន ៩០ ដើម និងសម្ភារៈសិក្សា រហូតដល់ការរៀបចំមេរៀន និងសកម្មភាពនីមួយៗ រាល់ព័ត៌មានលម្អិតទាំងអស់សុទ្ធតែបង្ហាញពីពេលវេលា ការខិតខំប្រឹងប្រែង និងការយកចិត្តទុកដាក់ដែលអ្នកគ្រូម៉ាបានផ្តល់ជូនដល់សិស្ស។

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកគ្រូម៉ា សម្រាប់ការយកចិត្តទុកដាក់ និងការចូលរួមចំណែករបស់អ្នកគ្រូចំពោះសិស្សនៅមណ្ឌលសិក្សាស្ទឹងព្រះស្រុកនិងសហគមន៍។

សូមអរគុណអ្នកគ្រូម៉ា ដែលបានចំណាយពេលវេលា និងការយកចិត្តទុកដាក់របស់អ្នកគ្រូមកកម្ពុជា និងបានផ្តល់ឱកាសកាន់តែច្រើនដល់សិស្សទាំងអស់របស់យើងក្នុងការរៀនសូត្រ អភិវឌ្ឍខ្លួន និងមានអារម្មណ៍ថាពួកគេតែងតែទទួលបានការយកចិត្តទុកដាក់និងការគាំទ្រពី អ្នកគ្រូ។

ភ្នំពេញ៖

កុមារមួយចំនួនមិនមែនគ្មានសមត្ថភាពនោះទេប៉ុន្តែពួកគេគ្រាន់តែត្រូវការពេលវេលាបន្ថែម ការលើកទឹកចិត្ត និងមនុស្សម្នាក់ដែលជឿជាក់លើពួកគេ។

សុខុម គឺជាសិស្សថ្នាក់ទី៦ នៅមណ្ឌលសិក្សាស្ទឹងព្រះស្រុក។ គាត់បានចូលរៀនភាសាអង់គ្លេសនិងកុំព្យូទ័រនៅអង្គការស៊ីថេបបានចំនួន ៦វគ្គ ដែលមានរយៈពេលជិត ៣ឆ្នាំ។

នៅពេលដែលគាត់ទើបចាប់ផ្តើមរៀន សុខុមគឺជាសិស្សម្នាក់ក្នុងចំណោមសិស្សដែលមានការលំបាកក្នុងការរៀនឱ្យទាន់មេរៀនជាមួយមិត្តរួមថ្នាក់។ សុខុមតែងតែខ្វះទំនុកចិត្តលើខ្លួនឯង។ ប៉ុន្តែពេញមួយរយៈពេលបីឆ្នាំនេះ គាត់មិនដែលបោះបង់ការខិតខំប្រឹងប្រែងរៀនសូត្ររបស់គាត់ឡើយ។ ទោះបីជាគាត់ត្រូវការពេលវេលាបន្ថែមដើម្បីស្វែងយល់ពីមេរៀននោះក៏ដោយ សុខុមនៅតែបន្តខិតខំរៀនសូត្រ ចូលរៀនទៀងទាត់ពេលវេលា រៀនស្វ័យសិក្សា ធ្វើលំហាត់អនុវត្ត និងព្យាយាមម្តងហើយម្តងទៀត តស៊ូពុះពារជម្នះរាល់ឧបសគ្គពេលជួបការលំបាក។

បន្តិចម្តងៗ យើងបានចាប់ផ្តើមឃើញការផ្លាស់ប្តូររបស់គាត់

សព្វថ្ងៃ សុខុម មានទំនុកចិត្តលើខ្លួនឯងកាន់តែច្រើន និងមានឆន្ទៈចូលរួមក្នុងថ្នាក់រៀន។ គាត់លើកដៃឆ្លើយសំណួរ ចែករំលែកគំនិត និងកាន់តែមានភាពងាយស្រួលក្នុងការបញ្ចេញមតិរបស់ខ្លួន។ តាមរយៈការរៀនភាសាអង់គ្លេស និងកុំព្យូទ័រ គាត់ក៏បានចាប់ផ្តើមស្វែងយល់ពីមេរៀនអ្វីដែលថ្មីៗ បង្កើតការផ្ចង់អារម្មណ៍លើការរៀននិងសមត្ថភាពការច្នៃប្រតិដ្ឋរបស់ខ្លួនផងដែរ។

មុនពេលមានកម្មវិធីបិទវគ្គសិក្សាទី៣៥ សុខុមបាននិពន្ធបទចម្រៀងមួយបទអំពីមណ្ឌលសិក្សាស្ទឹងព្រះស្រុក បន្ទាប់មកគាត់បានប្រើប្រាស់ឧបករណ៍បញ្ហាសិប្បនិម្មិតដើម្បីបំលែងគំនិតក្នុងអត្ថបទនៃចម្រៀងរបស់គាត់ទៅជាស្នាដៃតន្ត្រីមួយដែលមានអត្ថន័យខ្លឹមសារនិងពិរោះ។

ស្នាដៃច្នៃប្រតិដ្ឋនេះបានធ្វើឱ្យលោកគ្រូ អ្នកគ្រូបានឃើញពីសមត្ថភាពមួយផ្សេងទៀតរបស់ សុខុម ។ បន្ទាប់មក សុខុម ក៏ទទួលបានពានរង្វាន់មួយពី ស៊ីថេប នៅក្នុងពិធីបិទវគ្គសិក្សា ដើម្បីអបអរសាទរចំពោះការខិតខំប្រឹងប្រែង និងស្នាដៃច្នៃប្រឌិតរបស់គាត់។

កាលពីបីឆ្នាំមុន សុខុម ជាសិស្សខ្សោយ មិនសូវមានទំនុកចិត្តលើខ្លួនឯង ប៉ុន្តែសុខុមមិនដែលបោះបង់ការរៀនរបស់គាត់ឡើយនៅតែខិតខំព្យាយាមរៀនសូត្រ និងជឿជាក់លើខ្លួនឯងថាអាចធ្វើបាន។ សព្វថ្ងៃនេះ គាត់មានភាពក្លាហានក្នុងការបញ្ចេញគំនិត សាកល្បងអ្វីដែលថ្មីៗ និងភាពច្នៃប្រឌិតរបស់ខ្លួនទៅជាស្នាដៃដែលអាចចែករំលែកជាមួយអ្នកដទៃបាន។

ការរីកចម្រើនរបស់កុមារម្នាក់អាចមិនកើតឡើងយ៉ាងឆាប់រហ័សនោះទេ។ ប៉ុន្តែជាមួយនឹងពេលវេលា ឱកាស និងការលើកទឹកចិត្ត ការផ្លាស់ប្តូរអាចកើតមានឡើងបន្តិចម្តងៗ។

ដំណើរនៃការសិក្សារបស់ សុខុម នៅតែបន្ត ហើយលោកគ្រូអ្នកគ្រូរីករាយដែលបានឃើញការរីកចម្រើនរបស់គាត់ មួយវិញទៀតលោកគ្រូអ្នកគ្រូនិងទន្ទឹងរង់ចាំមើលថា តើឱកាស និងសមត្ថភាពអ្វីខ្លះទៀតដែលនឹងរង់ចាំសុខុមនៅថ្ងៃអនាគត

ភ្នំពេញ៖

ចាប់តាំងពីឆ្នាំ ២០១៣ កន្លងមក មណ្ឌលសិក្សាដានរុន (DR) បានផ្តល់ការសិក្សាភាសាអង់គ្លេស និងកុំព្យូទ័រដោយឥតគិតថ្លៃ នៅក្នុងវត្តមុនធ្យាន ក្នុងស្រុកសូទ្រនិគម ខេត្តសៀមរាប ដើម្បីជួយកុមារ និងយុជនសហគមន៍នៅក្នុងតំបន់។

ក្នុងរយៈពេល ១៣ ឆ្នាំកន្លងមក មានកុមាររាប់ពាន់នាក់បានឆ្លងកាត់ទ្វារមណ្ឌលសិក្សា ដានរុន ដើម្បីរៀនសូត្រ អភិវឌ្ឍខ្លួន និងស្វែងរកឱកាសថ្មីៗសម្រាប់អនាគត។ សរុបមក រយៈពេលកន្លងមកនេះ មណ្ឌលសិក្សាបានផ្តល់សេវាអប់រំដល់អ្នកចូលរួមមានចំនួន ២១៤,៥៨២ នាក់។

ក្នុងរយៈពេលប៉ុន្មានឆ្នាំចុងក្រោយនេះ អង្គការជាច្រើនបានចាប់ផ្តើមផ្តល់ការអប់រំភាសាអង់គ្លេស និងកុំព្យូទ័រនៅតាមសាលារដ្ឋក្នុងមូលដ្ឋាន ដែលធ្វើឱ្យចំនួនសិស្សនៅមណ្ឌលសិក្សា ដានរុន មានការថយចុះជាបន្តបន្ទាប់។

ដើម្បីនាំយកឱកាសសិក្សាទៅដល់កុមារកាន់តែច្រើន ស៊ីថេប បានសម្រេចផ្លាស់ប្តូរទីតាំងមណ្ឌលសិក្សា ដានរុន ទៅកាន់ សាលាបឋមសិក្សាគោកចាន់ ដែលមានចម្ងាយប្រមាណ ១១ គីឡូម៉ែត្រ ពីទីតាំងចាស់។

ការផ្លាស់ប្តូរទីតាំងនេះមិនមែនជាការបញ្ចប់នោះទេ ប៉ុន្តែជាការចាប់ផ្តើមថ្មី។

នៅថ្ងៃទី ២៥ ខែសីហា ស៊ីថេប បានបញ្ចប់ការផ្លាស់ប្តូរទីតាំងមណ្ឌលសិក្សាជាផ្លូវការ និងបានរៀបចំកិច្ចប្រជុំជាមួយសាលារៀន និងអាជ្ញាធរមូលដ្ឋាន ដើម្បីណែនាំអំពីមណ្ឌលសិក្សាថ្មី និងស្នើសុំការគាំទ្រជាបន្តពីសហគមន៍។

យើងខ្ញុំសូមថ្លែងអំណរគុណដល់សាលារៀន អាជ្ញាធរមូលដ្ឋាន លោកគ្រូ អ្នកគ្រូ និងអាណាព្យាបាលទាំងអស់ សម្រាប់ការគាំទ្ររបស់ពួកគាត់។ យើងសង្ឃឹមថា តាមរយៈការរួមគ្នាសហការ យើងអាចលើកទឹកចិត្តកុមារកាន់តែច្រើនឱ្យចូលរៀន និងបន្តការសិក្សារបស់ពួកគេ។

វគ្គសិក្សាទី ៣៨ បានចាប់ផ្តើមជាផ្លូវការនៅថ្ងៃទី ៣១ ខែសីហា!

ថ្នាក់រៀនថ្មី ប៉ុន្តែបេសកកម្មនៅតែដដែល៖

ផ្តល់ការអប់រំភាសាអង់គ្លេស និងកុំព្យូទ័រដោយឥតគិតថ្លៃ គាំទ្រកុមារនៅតាមសហគមន៍ជនបទ និងជួយបង្កើតឱកាសកាន់តែច្រើនសម្រាប់អនាគតរបស់ពួកគេ។

យើងទន្ទឹងរង់ចាំមើលការបន្តដំណើរនេះជាមួយគ្នា។

ភ្នំពេញ៖

ក្នុងខែកញ្ញានេះ ស៊ីថេប បានស្វាគមន៍មមណ្ឌលសិក្សាថ្មីមួយដែលទទួលបានការគាំទ្រពីវិស័យឯកជន គឺ មណ្ឌលសិក្សា ទួលធាតុ អ៊ីលីត ដែលមានទីតាំងនៅ សាលាបឋមសិក្សាទួលធាតុ នៅក្នុងខេត្តស្វាយរៀង។

មណ្ឌលនេះទទួលបានការគាំទ្រយ៉ាងពេញលេញពី ក្រុមហ៊ុន អ៊ីលីត​ (ខេមបូឌា) ខណៈដែល ស៊ីថេប ទទួលខុសត្រូវលើការគ្រប់គ្រង និងប្រតិបត្តិការមណ្ឌលសិក្សា។

មណ្ឌលសិក្សានេះត្រូវបានបង្កើតឡើងក្នុងគោលបំណងចូលរួមចំណែកដល់សហគមន៍មូលដ្ឋាន និងផ្តល់ឱកាសកាន់តែច្រើនដល់បុគ្គលិករោងចក្រ គ្រួសាររបស់ពួកគេ និងប្រជាជននៅក្នុងសហគមន៍ អាចសិក្សា និងអភិវឌ្ឍជំនាញថ្មីៗ។

បច្ចុប្បន្ន មណ្ឌលសិក្សានេះផ្តល់ជូននូវ ថ្នាក់ភាសាអង់គ្លេស និងកុំព្យូទ័រដោយឥតគិតថ្លៃ ដើម្បីជួយឱ្យអ្នកសិក្សាទទួលបានជំនាញជាក់ស្តែង ដែលអាចគាំទ្រដល់ការសិក្សា ការងារ និងជីវិតប្រចាំថ្ងៃរបស់ពួកគេ។

សិស្សចំនួន ៤២២ នាក់កំពុងសិក្សា

ចាប់តាំងពីបានបើកដំណើរការថ្នាក់សិក្សាជាផ្លូវការនៅថ្ងៃទី ១ ខែកញ្ញា ឆ្នាំ២០២៦ មណ្ឌលសិក្សាបានចុះឈ្មោះសិស្សសរុបចំនួន ៤២២ នាក់ ដែលកំពុងសិក្សានៅក្នុង ថ្នាក់ភាសាអង់គ្លេសចំនួន ៦ និងថ្នាក់កុំព្យូទ័រចំនួន ៦។

បច្ចុប្បន្ន ថ្នាក់ទាំងអស់កំពុងដំណើរការយ៉ាងរលូន ហើយសិស្សបានចូលរួមសិក្សាយ៉ាងសកម្ម។

គាំទ្រការអប់រំ និងលើកកម្ពស់បរិយាកាសសិក្សា

ក្រៅពីការគាំទ្រដល់ប្រតិបត្តិការរបស់មណ្ឌលសិក្សា ក្រុមហ៊ុន អ៊ីលីត ក៏យកចិត្តទុកដាក់លើការបង្កើតបរិយាកាសសិក្សាដែលកាន់តែប្រសើរសម្រាប់សិស្សផងដែរ។

ក្រុមហ៊ុនបានផ្តល់ជូនសាលានូវសម្ភារៈ និងបរិក្ខារជាច្រើន រួមមាន អំពូលសូឡាសម្រាប់បំភ្លឺខាងក្រៅ កង្ហារ ទូរទស្សន៍ Smart TV និងម៉ាស៊ីនព្រីន ដែលជួយធ្វើឱ្យបរិយាកាសសិក្សាមានសុវត្ថិភាព ផាសុកភាព និងសមស្របសម្រាប់ការរៀនសូត្រកាន់តែប្រសើរ។

ការចូលរួមចំណែកមួយ បង្កើតឱកាសកាន់តែច្រើន

សម្រាប់សាលាបឋមសិក្សាទួលធាតុ និងសហគមន៍ជុំវិញ ការចូលរួមចំណែកនេះមានអត្ថន័យយ៉ាងសំខាន់ចំពោះការអប់រំ។ លោកគ្រូ អ្នកគ្រូ សិស្សានុសិស្ស សមាជិកសហគមន៍ និងអាជ្ញាធរមូលដ្ឋាន បានបង្ហាញនូវការថ្លែងអំណរគុណ និងការកោតសរសើរចំពោះការគាំទ្រ និងការប្តេជ្ញាចិត្តរបស់ក្រុមហ៊ុន អ៊ីលីត។

ផលប៉ះពាល់នៃការអប់រំ មិនអាចមើលឃើញភ្លាមៗនោះទេ។ ប៉ុន្តែនៅពេលដែលមនុស្សម្នាក់ទទួលបានជំនាញថ្មី ឬទទួលបានឱកាសបន្ថែមក្នុងការសិក្សា វាអាចបើកទ្វារទៅកាន់ឱកាស និងលទ្ធភាពថ្មីៗសម្រាប់អនាគតរបស់ពួកគេ។

ស៊ីថេប មានសេចក្តីសោមនស្សរីករាយ និងសូម ថ្លែងអំណរគុណយ៉ាងជ្រាលជ្រៅ ចំពោះកិច្ចសហការជាមួយ ក្រុមហ៊ុន អ៊ីលីត សាលារៀន និងសហគមន៍មូលដ្ឋាន ក្នុងការរួមគ្នាធ្វើឱ្យ មណ្ឌលសិក្សា ទួលធាតុ អ៊ីលីត ក្លាយជាកន្លែងមួយដែលឱកាសសិក្សាអាចបន្តរីកចម្រើន និងពង្រីកកាន់តែទូលំទូលាយ។

យើងរួមគ្នា វិនិយោគលើការអប់រំ បង្កើតឱកាស និងកសាងអនាគតដ៏ភ្លឺស្វាងសម្រាប់សហគមន៍។

ភ្នំពេញ៖

នៅថ្ងៃទី៣១ ខែសីហា ស៊ីថេប បានសហការជាមួយនិងដៃគូ មូលនិធិអន្តរជាតិឃែរិស ក្នុងការរៀបចំកម្មវិធីពិនិត្យសុខភាពភ្នែកនៅមជ្ឈមណ្ឌលសិក្សាស្ទឹងព្រះស្រុក សម្រាប់សិស្សានុសិស្ស លោកគ្រូ អ្នកគ្រូ មាតាបិតា និងសមាជិកសហគមន៍ក្នុងតំបន់។

សកម្មភាពនេះបានផ្តល់សេវាពិនិត្យសុខភាពភ្នែកដល់កុមារ និងយុវជនដែលមានអាយុចាប់ពី ១២ ដល់ ២០ឆ្នាំ ព្រមទាំងមនុស្សវ័យចំណាស់អាយុ ៤០ឆ្នាំឡើងទៅដោយផ្តោតលើបញ្ហាការមើលជិត។ ការពិនិត្យនេះបានជួយដល់អ្នកដែលបានចូលរួមអាចស្វែងយល់ និងអាចកំណត់បញ្ហាភ្នែកដែលកើតមានជាទូទៅ មានដូចជា ពិបាកក្នុងការមើលវត្ថុអ្វីមួយដែលនៅឆ្ងាយៗ មើលឃើញវត្ថុនៅឆ្ងាយបានច្បាស់ប៉ុន្តែមើលវត្ថុនៅជិតមិនច្បាស់ ឬព្រិល និង ភ្នែកវ័យ​ ដែលកើតឡើងជាទូទៅនៅពេលមនុស្សឈានចូលវ័យអាយុចាប់ពី ៤០ ដល់ ៤៥ ឆ្នាំឡើងទៅ ករណីទាំងអស់នេះគឺស្ថិតនៅក្នុងដំណាក់កាលដំបូង។

សម្រាប់អ្នកចូលរួមដែលត្រូវការវ៉ែនតា ក្រុមការងារ មូលនិធិអន្តរជាតិឃែរិស ក៏បានផ្តល់វ៉ែនតាដល់អ្នកដែលមានបញ្ហាភ្នែកដោយឥតគិតថ្លៃ ដើម្បីជួយឱ្យពួកគេមើលឃើញបានកាន់តែច្បាស់ជាងមុន

ក្រៅពីការពិនិត្យមើលសុខភាពភ្នែក ក្រុមការងារក៏បានធ្វើ ការស្ទង់មតិសេដ្ឋកិច្ច និងជីវភាពរស់នៅរបស់សហគមន៍ ដើម្បីស្វែងយល់កាន់តែច្បាស់អំពីស្ថានភាពការរស់នៅរបស់គ្រួសារក្នុងសហគមន៍មានដូចជា ប្រភពចំណូល ជំនាញ និងតម្រូវការរបស់ពួកគេនាពេលអនាគត។ ទន្និន័យដែលប្រមូលបាននឹងត្រូវយកមកធ្វើជាសេចក្តីសន្និដ្ឋានសម្រាប់ការរៀបចំផែនការ កម្មវិធីអភិវឌ្ឍន៍ និងជួយសហគមន៍នាពេលអនាគត។

ស៊ីថេប មានសេចក្តីសោមនស្សរីករាយជាខ្លាំងដែលបានចូលរួមជាមួយនិង មូលនិធិអន្តរជាតិឃែរិស ក្នុងការនាំយកសកម្មភាពដែលមានអត្ថប្រយោជន៍ទាំងនេះមកកាន់សហគមន៍។ ចាប់ពីការលើកកម្ពស់សុខភាពភ្នែក រហូតដល់ការយល់ដឹងអំពីតម្រូវការរបស់គ្រួសារក្នុងសហគមន៍ រាល់កិច្ចការខិតខំប្រឹងប្រែងទាំងអស់នេះ គឺជាជំហានមួយឆ្ពោះទៅរកការអភិវឌ្ឍសហគមន៍កម្ពុជា។

ស៊ីថេបសូមថ្លែងអំណរគុណយ៉ាងជ្រាលជ្រៅចំពោះ មូលនិធិអន្តរជាតិឃែរិស សម្រាប់ការជឿទុកចិត្ត និងកិច្ចសហការមួយនេះ ហើយស៊ីថេបសង្ឃឹមថា នឹងបន្តធ្វើការរួមគ្នា ដើម្បីជួយសិស្ស គ្រួសារ និងសហគមន៍នៅកម្ពុជាឱ្យកាន់តែប្រសើរឡើង

ភ្នំពេញ៖

ក្នុងវ័យទើបតែ ១១ ឆ្នាំ ចាន់ណា គឺជាកូនស្រីច្បងនៅក្នុងគ្រួសារ និងជាបង្អែកយ៉ាងសំខាន់សម្រាប់ប្អូនៗរបស់នាង។

នាងភ្ញាក់ពីដំណេកនៅម៉ោង ៥:០០ ព្រឹកជារៀងរាល់ថ្ងៃ ដើម្បីជួយរៀបចំអាហារពេលព្រឹកដូចជា ដាំបាយ ធ្វើការងារផ្ទះ មើលថែប្អូនៗ និងជូនពួកគាត់ទៅសាលារៀន។ បន្ទាប់ពីចប់ម៉ោងសិក្សា នាងបានត្រឡប់មកផ្ទះវិញដើម្បីជួយជីដូនរៀបចំអាហារថ្ងៃត្រង់។ ក្នុងពេលទំនេរ នាងក៏បានជួយធ្វើការងារកសិកម្មខ្លះៗដូចជា ស្រោចបន្លែ ប្រមូលផលដំណាំ និងយកទៅលក់ដូរនៅផ្សារជាមួយយាយដើម្បីចូលរួមចំណែកក្នុងការកាត់បន្ថយការចំណាយប្រចាំថ្ងៃរបស់គ្រួសារ។

បច្ចុប្បន្ននេះ ចាន់ណា និងប្អូនៗ ៣ នាក់ទៀត ត្រូវបានមើលថែទាំដោយជីដូនជរារបស់ពួកគេ ខណៈដែលឪពុកម្តាយត្រូវឃ្លាតឆ្ងាយពីផ្ទះទៅធ្វើការជាកម្មករស៊ីឈ្នួល។ ពួកគាត់អាចផ្ញើរប្រាក់មកផ្ទះបានត្រឹមតែប្រហែល ១៥ ដុល្លារអាមេរិកប៉ុណ្ណោះក្នុងមួយខែ ដែលធ្វើឱ្យគ្រួសារជួបការលំបាកយ៉ាងខ្លាំងក្នុងការផ្គត់ផ្គង់តម្រូវការប្រចាំថ្ងៃ។ ដើម្បីទ្រទ្រង់សេដ្ឋកិច្ចគ្រួសារ ជួនកាលជីដូនរបស់នាងត្រូវធ្វើដំណើរទៅឆ្ងាយពីផ្ទះដើម្បីស៊ីឈ្នួលដាំដំឡូងមី និងដើមស្វាយចន្ទី។

ទោះបីជាជួបប្រទះនូវបញ្ហាប្រឈមទាំងនេះក៏ដោយ ក៏ចាន់ណាមិនព្រមបោះបង់ការសិក្សារបស់នាងឡើយ។ ដោយសារហេតុផលទាំងអស់នេះហើយទើប ជួនកាលនាងបាននាំប្អូនៗទៅសាលារៀនជាមួយផងដែរ។ នាងចូលចិត្តរៀនកុំព្យូទ័រខ្លាំងណាស់ ដូច្នេះនាងតែងតែទៅដល់សាលាមុនម៉ោង ឬនៅបន្តបន្ទាប់ក្រោយពីចប់ម៉ោងសិក្សា ដើម្បីបានប្រើប្រាស់កុំព្យូទ័ររបស់សាលា និងអនុវត្តន៍មេរៀនបន្ថែមទៀត។ នាងរីករាយនឹងការវាយអត្ថបទ និងការបង្កើតសាច់រឿង ព្រមទាំងការប្រើប្រាស់កម្មវិធីគូររូបផងដែរ។ ចំនែកនៅក្នុងថ្នាក់រៀនភាសាអង់គ្លេសវិញ នាងចូលចិត្តការរៀនពាក្យវាក្យសព្ទថ្មីៗតាមរយៈហ្គេម កិច្ចសន្ទនា និងសកម្មភាពឆ្លើយឆ្លងសំនួរគ្នាទៅវិញទៅមកផងដែរ។

សម្រាប់ចាន់ណា ការអប់រំគឺលើសពីការរៀនសូត្រនៅក្នុងថ្នាក់រៀន ដោយសារវាគឺជាក្តីសង្ឃឹមរបស់នាងសម្រាប់អនាគតដ៏ល្អប្រសើរមួយនាថ្ងៃខាងមុខ។

នាងស្រមៃចង់ក្លាយជាគ្រូបង្រៀន ឬជាបុគ្គលិកផ្នែកបច្ចេកវិទ្យាព័ត៌មាន (IT)ម្នាក់ នៅក្នុងសហគមន៍របស់នាង ដើម្បីអាចចែករំលែកនូវចំនេះដឹងដែលនាងបានរៀនសូត្រកន្លងមក ទៅដល់កុមារដទៃទៀតដែលមកពីគ្រួសារក្រីក្រខ្វះខាត។

នាងបានពោលពាក្យមួយឃ្លាថា ទោះបីជានាងហត់នឿយយ៉ាងណាក៏ដោយ ក៏នាងមិនបោះបង់ការសិក្សារបស់នាងឡើយ ព្រោះចំណេះដឹងគឺជាផ្លូវតែមួយគត់ដែលអាចជួយនាងនិងប្អូនៗឱ្យមានអនាគតល្អប្រសើរជាងនេះ»។

ក្នុងវ័យទើបតែ ១១ ឆ្នាំ ចាន់ណាបានលីសែងបន្ទុកទទួលខុសត្រូវដែលកុមារជាច្រើនក្នុងវ័យដូចនាងមិនធ្លាប់បានជួបប្រទះឡើយ។ ទោះជាយ៉ាងណាក៏ដោយ នាងនៅតែបន្តការពារឱកាសក្នុងការរៀនសូត្ររបស់នាង ដោយដើរទៅមុខបន្តិចម្តងៗឆ្ពោះទៅរកអនាគតដ៏ល្អប្រពៃសម្រាប់ខ្លួននាង និងក្រុមគ្រួសារផងដែរ។

ភ្នំពេញ៖

នៅថ្ងៃទី ១៥ ខែសីហា ឆ្នាំ២០២៦ ក្រុមសេវាកម្មអន្តរជាតិ Flyoung ដែលមកពី សាកលវិទ្យាល័យវេជ្ជសាស្ត្រតៃប៉ិ បានមកកាន់ទីស្នាក់ការកណ្តាលរបស់អង្គការ ស៊ីថេប នៅក្នុងខេត្តសៀមរាប ដើម្បីរៀបចំវគ្គបណ្តុះបណ្តាលអប់រំសុខភាពទៅកាន់លោកគ្រូអ្នកគ្រូដែលមកពីតំបន់ជនបទ។

វគ្គបណ្តុះបណ្តាលនេះបានផ្តោតលើប្រធានបទសំខាន់ៗទាក់ទងនឹងសុខភាព ដូចជា ការការពារជំងឺមហារីក និងអាហារូបត្ថម្ភ ព្រមទាំងបានណែនាំអំពី ចំណេះដឹងផ្នែកហិរញ្ញវត្ថុជាក់ស្តែង ដើម្បីឆ្លើយតបទៅនឹងតម្រូវការក្នុងជីវិតប្រចាំថ្ងៃរបស់ប្រជាជននៅសហគមន៍ជនបទ។

ស្វែងយល់អំពីជំងឺមហារីក និងវិធីការពារ

ក្នុងវគ្គនេះ លោកគ្រូអ្នកគ្រូបានស្វែងយល់អំពីប្រភេទជំងឺមហារីកដែលកើតមានជាទូទៅនៅកម្ពុជា រួមមាន មហារីកថ្លើម មហារីកសួត មហារីកសុដន់ មហារីកមាត់ស្បូន និងមហារីកពោះវៀនធំ និងរន្ធគូថ។

លោកគ្រូអ្នកគ្រូបានសិក្សាអំពី មូលហេតុ និងកត្តាប្រឈមនៃជំងឺមហារីក សញ្ញាព្រមានដែលគួរយកចិត្តទុកដាក់ ការពិនិត្យរកជំងឺនៅដំណាក់កាលដំបូង ការព្យាបាល និងការថែទាំ ព្រមទាំងវិធីសាស្ត្រជាក់ស្តែងក្នុងការកាត់បន្ថយហានិភ័យនៃជំងឺមហារីកនៅក្នុងជីវិតប្រចាំថ្ងៃផងដែរ។

ក្នុងការអប់រំសុខភាព ជំហានដំបូងមិនមែនតែងតែមានន័យថា យើងត្រូវធ្វើអ្វីៗឱ្យកាន់តែច្រើននោះទេ។ ប៉ុន្តែយើងគួរចាប់ផ្តើមពី ការយល់ដឹងថា តើយើងគួរយកចិត្តទុកដាក់លើអ្វី និងតើអ្វីខ្លះអាចការពារបានតាមរយៈការចាត់វិធានការឱ្យបានទាន់ពេលវេលា។

សុខភាពក៏ចាប់ផ្តើមពីអ្វីដែលយើងបរិភោគជារៀងរាល់ថ្ងៃ

ក្រៅពីការអប់រំអំពីជំងឺមហារីក ក្រុម Flyoung ក៏បានណែនាំលោកគ្រូអ្នកគ្រូអំពី សារធាតុចិញ្ចឹមសំខាន់ៗ ដែលមាននៅក្នុងអាហារប្រចាំថ្ងៃ រួមមាន វីតាមីន A, B1, B9 (Folate) និង B12, វីតាមីន C, ជាតិដែក កាល់ស្យូម និងអំបិល។

តាមរយៈវគ្គនេះ លោកគ្រូអ្នកគ្រូបានយល់ដឹងកាន់តែច្បាស់អំពី ផលប៉ះពាល់នៃការខ្វះសារធាតុចិញ្ចឹម និងវិធីរក្សារបបអាហារឱ្យមានតុល្យភាព និងសមស្របសម្រាប់ជីវិតប្រចាំថ្ងៃ។

សម្រាប់គ្រួសារជាច្រើននៅតំបន់ជនបទ ការថែរក្សាសុខភាពមិនចាំបាច់ត្រូវចាប់ផ្តើមពីការផ្លាស់ប្តូរដ៏ស្មុគស្មាញនោះទេ។ ការយល់ដឹងអំពីអ្វីដែលយើងបរិភោគ និងការជ្រើសរើសអាហារឱ្យបានល្អប្រសើរជាងមុនក្នុងជីវិតប្រចាំថ្ងៃ ក៏អាចជាជំហានដ៏សំខាន់មួយរួចទៅហើយ។

ពីការអប់រំសុខភាព ឈានទៅរកការគ្រប់គ្រងហិរញ្ញវត្ថុ

នៅក្នុងវគ្គនេះដែរ ពួកគេក៏បានណែនាំប្រធានបទដ៏មានប្រយោជន៍មួយទៀត គឺ ចំណេះដឹងផ្នែកហិរញ្ញវត្ថុ (Financial Literacy)។

លោកគ្រូអ្នកគ្រូក៏បានសិក្សាអំពី ការគ្រប់គ្រងប្រាក់ចំណូល និងចំណាយជាមូលដ្ឋាន ការបង្កើតទម្លាប់សន្សំប្រាក់ និងកត្តាសំខាន់ៗដែលគួរពិចារណា នៅពេលដាក់ពាក្យស្នើសុំកម្ចី ឬប្រើប្រាស់សេវាមីក្រូហិរញ្ញវត្ថុ ដូចជា អត្រាការប្រាក់ ថ្លៃសេវា រយៈពេលសង និងលក្ខខណ្ឌផ្សេងៗ។

សំខាន់ជាងនេះទៅទៀត ពួកគេបានរៀនពី វិធីគណនាការប្រាក់ និងចំណាយពិតប្រាកដនៃការកម្ចី ដើម្បីឱ្យពួកគេអាចយល់កាន់តែច្បាស់អំពីកាតព្វកិច្ច និងទំនួលខុសត្រូវផ្នែកហិរញ្ញវត្ថុ មុនពេលសម្រេចចិត្តខ្ចីប្រាក់។

សម្រាប់គ្រួសារនៅសហគមន៍ជនបទ ការមានចំណេះដឹងអំពី ការគ្រប់គ្រងហិរញ្ញវត្ថុផ្ទាល់ខ្លួន ក៏ជាវិធីដ៏សំខាន់មួយក្នុងការការពារខ្លួន និងគ្រួសាររបស់ពួកគេផងដែរ។

អរគុណក្រុម Flyoung

សូមអរគុណដល់ ក្រុម Flyoung ដែលបានបន្តចុះមកកាន់សហគមន៍ជនបទក្នុងប្រទេសកម្ពុជា ដើម្បីចែករំលែកចំណេះដឹង និងបទពិសោធន៍ជាក់ស្តែងជាមួយគ្រូបង្រៀនក្នុងមូលដ្ឋាន។

ផលវិជ្ជមាននៃការអប់រំ មិនតែងតែកើតឡើងភ្លាមៗនៅពេលបញ្ចប់ថ្នាក់រៀននោះទេ។ វាចាប់ផ្តើមពីមនុស្សម្នាក់ ហើយបន្តរីកសាយទៅកាន់មនុស្សជាច្រើនទៀត។

ភ្នំពេញ៖

ដើម្បីអបអរសាទរពិធីបុណ្យចូលឆ្នាំថ្មីប្រពៃណីខ្មែរ និងសម្តែងនូវការថ្លែងអំណរគុណចំពោះការខិតខំប្រឹងប្រែងបំពេញការងាររបស់លោកគ្រូអ្នកគ្រូពេញមួយឆ្នាំកន្លងមកនេះ អង្គការ ស៊ីថេប បានរៀបចំកម្មវិធីជួបជុំសប្បាយរីករាយនៅការិយាល័យខេត្តសៀមរាប។ លោកគ្រូអ្នកគ្រូក៏ត្រូវបានអនុញ្ញាតឱ្យនាំក្រុមគ្រួសារមកចូលរួមផងដែរ ដែលធ្វើឱ្យការអបអរសាទរនេះកាន់តែមានភាពរីករាយ និងមានអត្ថន័យទ្វេដង។

ព្រឹត្តិការណ៍នេះពោរពេញទៅដោយស្នាមញញឹម និងបរិយាកាសសប្បាយរីករាយ។ អ្នកចូលរួមទាំងអស់បានពិសាអាហារដ៏ឈ្ងុយឆ្ងាញ់ លេងល្បែងប្រជាប្រិយខ្មែរ ច្រៀងចម្រៀង និងរាំលេងកម្សាន្ត ដែលបានបង្ហាញយ៉ាងពិតប្រាកដនូវស្មារតីនៃពិធីបុណ្យចូលឆ្នាំខ្មែរ។

ក្នុងឱកាសដ៏ពិសេសនេះដែរ យើងក៏បានផ្តល់ការលើកទឹកចិត្តដល់អប់រំករឆ្នើមចំនួនពីររូប រួមមាន៖

គ្រូបង្រៀនឆ្នើមប្រចាំឆ្នាំ — លោកគ្រូ ជុំ សុខុម (បង្រៀននៅមណ្ឌលសិក្សា តាស្នែ)

គ្រូបង្រៀនផ្នែកកូដ (Coding) ឆ្នើមប្រចាំឆ្នាំ — លោកគ្រូ ហេង សំរេច (បង្រៀននៅមណ្ឌលសិក្សា រកា) ដើម្បីជាការតបស្នងចំពោះការលះបង់ និងការរួមចំណែកយ៉ាងសកម្មក្នុងវិស័យអប់រំ។

យើងខ្ញុំសូមជូនពរដល់លោកគ្រូអ្នកគ្រូ និងសិស្សានុសិស្សទាំងអស់នៅតាមសហគមន៍ជនបទ សូមជួបតែសេចក្តីសុខ និងសេចក្តីសប្បាយក្នុងឱកាសបុណ្យចូលឆ្នាំថ្មីនេះ។ នៅពេលដែលយើងចាប់ផ្តើមទំព័រថ្មី យើងទន្ទឹងរង់ចាំបន្តដំណើរជាមួយគ្នា ដើម្បីបង្កើតឱកាសបន្ថែមទៀតសម្រាប់កុមារក្នុងការសិក្សា និងអភិវឌ្ឍខ្លួន។

ភ្នំពេញ៖

កាលពីឆ្នាំមុន អ្នកស្រី ឈិង ម៉ា បានចំណាយពេលរយៈពេល ៤ សប្តាហ៍នៅក្នុងប្រទេសកម្ពុជា ដោយបានចំណាយពេលជាមួយកុមារ អានសៀវភៅ និងគូររូបជាមួយពួកគេ ព្រមទាំងចែករំលែកចំណេះដឹង និងបទពិសោធន៍របស់អ្នកស្រី។

ទោះបីរយៈពេលវេលានៅប្រទេសកម្ពុជារបស់អ្នកស្រីបានបញ្ចប់ហើយក៏ដោយ ក៏អ្នកស្រីមិនដែលភ្លេចកុមារទាំងនេះឡើយ។

អ្នកស្រីនៅតែបន្តទាក់ទងជាមួយគ្រូ និងសិស្សរបស់អង្គការ ស៊ីថេប ដោយសួរអំពីការសិក្សារបស់ពួកគេ និងតាមដានសុខុមាលភាពរបស់ពួកគេជាបន្តបន្ទាប់។

ក្នុងអំឡុងពេលដែលអ្នកស្រីបង្រៀននៅមណ្ឌលសិក្សា ស្ទឹងព្រះស្រុក កាលពីឆ្នាំមុន អ្នកស្រីបានសង្កេតឃើញថា មានកុមារមួយចំនួនមានរាងកាយតូចល្អិត និងខ្សោយជាងកុមារដទៃ។ បន្ទាប់ពីបានស្វែងយល់បន្ថែមអំពីស្ថានភាពរបស់ពួកគេ អ្នកស្រីបានសម្រេចចិត្តជួយគាំទ្រកុមារចំនួន ៥ នាក់ ដោយផ្តល់អាហារមានជីវជាតិរយៈពេល ៦ ខែ រួមមានទឹកដោះគោ ស៊ុត ប៊ឺសណ្តែកដី និងនំប៉័ង ដើម្បីជួយបំពេញបន្ថែមអាហារូបត្ថម្ភប្រចាំថ្ងៃរបស់ពួកគេ។

ចាប់តាំងពីថ្ងៃទី ៥ ខែកក្កដា មក គ្រូៗ ស៊ីថេប បានផ្តល់អាហារមានជីវជាតិទាំងនេះជូនកុមារចំនួន ២ លើករួចមកហើយ។

កុមារតែងតែមានក្តីសប្បាយរីករាយយ៉ាងខ្លាំងនៅពេលទទួលបានអាហារទាំងនេះ។ សម្រាប់កុមារដែលរស់នៅតាមសហគមន៍ជនបទ ទឹកដោះគោ និងប៊ឺសណ្តែកដី គឺជាអាហារដែលពួកគេកម្រមានឱកាសទទួលទាន។ ការគាំទ្រនេះ មិនមែនគ្រាន់តែជាការផ្តល់អាហារដែលមានជីវជាតិប៉ុណ្ណោះទេ ប៉ុន្តែថែមទាំងជួយឱ្យកុមារមានអារម្មណ៍ថា មាននរណាម្នាក់ពិតជាយកចិត្តទុកដាក់ និងខ្វល់ខ្វាយពីពួកគេ។

សូមអរគុណអ្នកស្រី ឈិង ម៉ា ដែលនៅតែគិតគូរ និងយកចិត្តទុកដាក់ចំពោះកុមារកម្ពុជាជានិច្ច ទោះបីជាអ្នកស្រីនៅឆ្ងាយពីពួកគេក៏ដោយ។

ការអប់រំត្រូវការពេលវេលា ហើយការលូតលាស់របស់កុមារក៏ត្រូវការពេលវេលាដូចគ្នា។ នៅតាមដំណើរនៃការរីកចម្រើនរបស់ពួកគេ ការមាននរណាម្នាក់ដែលស្ម័គ្រចិត្តបន្តយកចិត្តទុកដាក់ និងគាំទ្រពួកគេ គឺជាអ្វីដែលមានតម្លៃយ៉ាងពិតប្រាកដ។

សូមអរគុណសម្រាប់ការបន្តនៅក្បែរពួកគេជានិច្ច។

ភ្នំពេញ៖

អស់រយៈពេលជាច្រើនឆ្នាំមកហើយដែល ស៊ីថេប បានអនុវត្តកម្មវិធីអប់រំនានានៅក្នុងប្រទេសកម្ពុជា និងរក្សាបាននូវភាពជាដៃគូដ៏រឹងមាំជាមួយ DVO ដែលជានាយកដ្ឋានតម្រង់ទិសវិជ្ជាជីវៈ នៃក្រសួងអប់រំ យុវជន និងកីឡា (MoEYS)។

នៅឆ្នាំ ២០២៦ ស៊ីថេប បានបន្តសហការជាមួយ DVO ម្តងទៀត ដើម្បីនាំយកការអប់រំផ្នែក STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) និងបច្ចេកវិទ្យាទៅកាន់វិទ្យាល័យនានាទូទាំងប្រទេសកម្ពុជា ដោយផ្តល់ឱកាសឱ្យសិស្សកាន់តែច្រើនបានអភិវឌ្ឍជំនាញឌីជីថល និងបច្ចេកវិទ្យាដែលអាចអនុវត្តបានក្នុងជីវិតពិត។

នៅឆ្នាំនេះ គម្រោងអប់រំ ស្ទែម នឹងត្រូវអនុវត្តនៅក្នុង វិទ្យាល័យចំនួន ១៥ ក្នុងខេត្តចំនួន ៩ រួមមាន ខេត្តសៀមរាប ព្រះវិហារ ឧត្តរមានជ័យ កោះកុង បន្ទាយមានជ័យ កំពង់ចាម ស្ទឹងត្រែង រតនគិរី និងព្រៃវែង។

កម្មវិធីនេះផ្តោតសំខាន់លើការរៀនសូត្រតាមរយៈការអនុវត្តជាក់ស្តែង ដោយមានវគ្គសិក្សាដូចជា ការសរសេរកូដ (Coding), មនុស្សយន្ត (Robotics), ការអភិវឌ្ឍគេហទំព័រ (Web Development), ការអភិវឌ្ឍប្រព័ន្ធ (System Development) និងការជួសជុលកុំព្យូទ័រ (Computer Repair)។ បន្ថែមពីលើការជួយសិស្សអភិវឌ្ឍជំនាញបច្ចេកវិទ្យា កម្មវិធីនេះក៏ជួយគាំទ្រដល់គ្រូបង្រៀនឱ្យទទួលបានបទពិសោធន៍ក្នុងការបង្រៀនផ្នែកបច្ចេកវិទ្យាផងដែរ។

កាលពីខែកក្កដា គម្រោងនេះបានចាប់ផ្តើមជាផ្លូវការនៅ វិទ្យាល័យចំណេះទូទៅ និងបច្ចេកទេស ជា ស៊ីម ត្បែងមានជ័យ ក្នុងខេត្តព្រះវិហារ និង វិទ្យាល័យអង្គរ ក្នុងខេត្តសៀមរាប។ គ្រូបច្ចេកទេសរបស់អង្គការ ស៊ីថេប បានធ្វើដំណើរទៅកាន់សាលារៀននានា ដើម្បីបង្រៀនសិស្ស ខណៈសិស្សមួយចំនួនក៏បានចូលរួមការបណ្តុះបណ្តាលអនុវត្តនៅមណ្ឌលសិក្សារបស់ ស៊ីថេប ផងដែរ។

វិទ្យាល័យដែលនៅសេសសល់នឹងចាប់ផ្តើមកម្មវិធីបណ្តុះបណ្តាលរបស់ខ្លួនជាបន្តបន្ទាប់ក្នុងប៉ុន្មានសប្តាហ៍ខាងមុខ។ តាមរយៈការបន្តភាពជាដៃគូជាមួយ DVO ស៊ីថេប សង្ឃឹមថានឹងអាចនាំយកការអប់រំបច្ចេកវិទ្យាទៅកាន់សិស្សវិទ្យាល័យកម្ពុជាកាន់តែច្រើន ដោយផ្តល់ឱកាសឱ្យពួកគេស្វែងយល់អំពីបច្ចេកវិទ្យា រៀនតាមរយៈការអនុវត្តជាក់ស្តែង និងកសាងជំនាញសម្រាប់ការសិក្សា និងអាជីពរបស់ពួកគេនាពេលអនាគត។

ចាប់ផ្តើមពីការអប់រំ យើងកំពុងជួយយុវជនកម្ពុជាកសាងជំនាញបច្ចេកវិទ្យាដែលពួកគេត្រូវការសម្រាប់អនាគត។

#ស៊ីថេប #DVO #ការអប់រំស្ទែម #កម្ពុជា #ការអប់រំបច្ចេកវិទ្យា #ជនាញឌីជីថល

ភ្នំពេញ៖

ហេង គឹមហុង មានអាយុ ១៣ ឆ្នាំ គឺជាសិស្សថ្នាក់ទី ៧ នៅសាលាអនុវិទ្យាល័យតាយ៉ែក។ រៀងរាល់ថ្ងៃ គេជិះកង់តាមដងផ្លូវដីក្រហមក្នុងភូមិដើម្បីទៅរៀន។ ទោះបីជាការធំដឹងក្ដីឡើងរបស់គេមិនមែនជារឿងងាយស្រួលក៏ដោយ គឹមហុង មិនដែលបោះបង់ការសិក្សានោះទេ។ គេជឿជាក់យ៉ាងមុតមាំថា ការអប់រំអាចបង្កើតអនាគតដ៏ភ្លឺស្វាងមួយផ្សេងទៀតសម្រាប់ទាំងរូបគេ និងគ្រួសារ។

ឪពុកម្តាយរបស់ គឹមហុង បានលែងលះគ្នាតាំងពីគេមានអាយុ ៣ ឆ្នាំមកម៉្លេះ ហើយរូបគេ និងបងប្រុស ត្រូវបានចិញ្ចឹមបីបាច់ថែរក្សាដោយលោកយាយជរាតាំងពីពេលនោះមក។ បច្ចុប្បន្ន លោកយាយមានអាយុ ៧៨ ឆ្នាំទៅហើយ ប៉ុន្តែគាត់នៅតែបន្តមើលថែគ្រួសារ ក្នុងពេលដែលពួកគេកំពុងប្រឈមមុខនឹងបំណុលដែលបន្សល់ទុកដោយឪពុកម្តាយរបស់គេ។ បន្ទាប់ពីម្តាយបានចាកចេញពីស្រុកកំណើតទៅធ្វើការនៅខេត្តផ្សេង គាត់ក៏បានបាត់ការទាក់ទងបន្តិចម្តងៗជាមួយគ្រួសារ។ សព្វថ្ងៃនេះ គ្រួសារទាំងមូលពឹងផ្អែកជាសំខាន់លើប្រាក់ចំណូលរបស់បងប្រុសអាយុ ២២ ឆ្នាំរបស់ គឹមហុង ដែលធ្វើការជាកម្មករសំណង់។

ដោយសារជីវភាពគ្រួសារមានការលំបាក គឹមហុង ទទួលបានការឧបត្ថម្ភការសិក្សាប្រមាណ ១២.៥០ ដុល្លារក្នុងមួយខែ តាមរយៈកម្មវិធីគាំទ្ររបស់រាជរដ្ឋាភិបាលសម្រាប់គ្រួសារមានប័ណ្ណក្រីក្រ។ ទោះជាយ៉ាងណាក៏ដោយ ថវិកានេះមិនគ្រប់គ្រាន់ក្នុងការចំណាយទៅលើតម្រូវការសិក្សាទាំងអស់របស់គេនោះទេ។ គេគ្មានលទ្ធភាពរៀនគួរបន្ថែមនោះទេ ឯកសណ្ឋានសិស្សរបស់គេក៏ចាស់និងរហែក ហើយជារឿយៗសម្ភារសិក្សារបស់គេតែងតែខ្វះខាតជានិច្ច ។

ដោយសាររស់នៅជិតមណ្ឌលសិក្សា តាយ៉ែក របស់អង្គការ ស៊ីថេប បានផ្តល់ឱកាសឱ្យ គឹមហុង បានចូលរួមក្នុងកម្មវិធីអប់រំតាមជនបទរបស់ ស៊ីថេប ដែលគេអាចចូលរៀនថ្នាក់ភាសាអង់គ្លេស និងកុំព្យូទ័រដោយឥតគិតថ្លៃ។ តាមរយៈថ្នាក់រៀនទាំងនេះ គេបានបង្កើតចំណាប់អារម្មណ៍យ៉ាងខ្លាំងលើផ្នែកកុំព្យូទ័រ និងបច្ចេកវិទ្យាព័ត៌មាន។ ទោះបីជាជីវិតប្រចាំថ្ងៃរបស់គេរវល់យ៉ាងណាក៏ដោយ គេនៅតែបន្តចូលរៀនទាំងថ្នាក់ភាសាអង់គ្លេស និងកុំព្យូទ័រ ហើយបច្ចុប្បន្នគេបានបញ្ចប់ការសិក្សាចំនួន ៤ វគ្គ រួចមកហើយ។

សម្រាប់លោកគ្រូអ្នកគ្រូ គឹមហុង មិនត្រឹមតែជាសិស្សខិតខំរៀនសូត្រប៉ុណ្ណោះទេ ប៉ុន្តែថែមទាំងតែងតែស្ម័គ្រចិត្តជួយអ្នកដទៃជានិច្ច។ គេជួយលោកគ្រូអ្នកគ្រូជាញឹកញាប់ដោយការពន្យល់មេរៀនដល់មិត្តរួមថ្នាក់ និងជួយពិនិត្យកិច្ចការផ្ទះ។ ឱ្យតែមានពេលទំនេរពីសាលារដ្ឋ គេតែងតែត្រឡប់មកមណ្ឌលសិក្សាវិញដើម្បីសួរសំនួរ ហាត់សរសេរកូដ រៀនការរចនាក្រាហ្វិក និងស្វែងយល់បន្ថែមអំពីពិភពបច្ចេកវិទ្យា។

ក្ដីស្រមៃរបស់គេគឺច្បាស់លាស់ណាស់ — គឺចង់ក្លាយជាអ្នកជំនាញផ្នែកបច្ចេកវិទ្យាព័ត៌មាន (IT)។

នាពេលអនាគត គឹមហុង សង្ឃឹមថានឹងអាចអភិវឌ្ឍកម្មវិធី (Software & Applications) ដែលអាចជួយដល់ប្រជាជននៅក្នុងសហគមន៍របស់គេ និងធ្វើឱ្យជីវិតប្រចាំថ្ងៃរបស់ពួកគេកាន់តែងាយស្រួល។

ការខិតខំប្រឹងប្រែងរបស់គេចាប់ផ្តើមហុចផ្លែផ្កាហើយ។ វគ្គសិក្សានេះ គឹមហុង ទទួលបានចំណាត់ថ្នាក់លេខ ៣ នៅក្នុងថ្នាក់។ ដើម្បីទទួលស្គាល់នូវការខិតខំប្រឹងប្រែង និងស្នាដៃរបស់គេ ស៊ីថេប បានប្រគល់ជូនគេនូវឯកសណ្ឋានសិស្សថ្មី កាតាប សៀវភៅសរសេរ និងសម្ភារសិក្សាផ្សេងៗទៀត ក្នុងពិធីបិទវគ្គសិក្សា។ ការទទួលបានកាដូទាំងនេះបាននាំមកនូវក្តីរំភើបយ៉ាងខ្លាំង និងផ្តល់កម្លាំងចិត្តបន្ថែមទៀតដល់គេក្នុងការបន្តដើរឆ្ពោះទៅរកគោលដៅរបស់ខ្លួន។

ការតាំងចិត្តរបស់ គឹមហុង គឺលើសពីការសិក្សានៅក្នុងថ្នាក់រៀនទៅទៀត។

រៀងរាល់ព្រឹកមុនពេលទៅរៀន គេភ្ញាក់ពីព្រលឹមដើម្បីជួយលោកយាយពុះឧស ដាំទឹក ដងទឹកដាក់ពាង ប្រមូលរៀបចំផ្ទះ និងដាំបាយ។ បន្ទាប់ពីត្រឡប់មកពីសាលារៀនវិញ គេជួយការងារផ្ទះជាមុនសិន ទើបអង្គុយរៀនតាមក្រោយ។ ជាច្រើនយប់មកហើយដែលគេនៅតែបន្តរៀនរហូតដល់យប់ជ្រៅ ទោះបីជាគេដឹងថាគេត្រូវភ្ញាក់ពីព្រលឹមនៅព្រឹកបន្ទាប់ទៀតក៏ដោយ។

គេខិតខំរៀនសូត្រមិនមែនត្រឹមតែសម្រាប់ខ្លួនឯងនោះទេ។

គឹមហុង សង្ឃឹមថាថ្ងៃណាមួយ គេនឹងអាចលើកកម្ពស់ជីវភាពគ្រួសារឱ្យកាន់តែប្រសើរឡើង ដើម្បីឱ្យបងប្រុសរបស់គេមិនបាច់ទ្រាំទ្រនឹងភាពលំបាកនៃការងារសំណង់ទៀត ហើយលោកយាយដែលបានមើលថែរូបគេតាំងពីតូច អាចរីករាយនឹងជីវិតដែលមានក្តីសុខ និងផាសុកភាពជាងមុននៅក្នុងវ័យជរា។ គេក៏នៅតែសង្ឃឹមថាថ្ងៃណាមួយ គេនឹងបានជួបជុំគ្នាម្តងទៀតជាមួយម្តាយរបស់គេ។

ទោះបីជាមានបញ្ហាប្រឈមជាច្រើនក្នុងការធំដឹងក្ដីក៏ដោយ គឹមហុង មិនដែលឈប់សម្លឹងមើលទៅអនាគតនោះទេ។ សម្រាប់គេ ជំនាញថ្មីនីមួយៗ និងមេរៀននីមួយៗដែលគេបានរៀន គឺជាជំហានមួយទៀតឆ្ពោះទៅរកក្តីស្រមៃលើវិស័យបច្ចេកវិទ្យារបស់គេ។

គឹមហុង ក៏សូមថ្លែងអំណរគុណយ៉ាងជ្រាលជ្រៅចំពោះ ស៊ីថេប និងអ្នកទាំងអស់គ្នាដែលបានគាំទ្រការអប់រំតាមជនបទ។ តាមរយៈការគាំទ្រនេះ គេទទួលបានច្រើនជាងថ្នាក់រៀនភាសាអង់គ្លេស និងកុំព្យូទ័រដោយឥតគិតថ្លៃ។ គេក៏មានឱកាសរៀនសរសេរកូដ និងជំនាញឌីជីថល ដែលពន្លឺធ្វើឱ្យគេឃើញពីលទ្ធភាពសម្រាប់អនាគត ដែលគេប្រហែលជាមិនធ្លាប់ស្រមៃដល់ពីមុនមក។

ផ្លូវដីក្រហមដែលគេធ្វើដំណើរជារៀងរាល់ថ្ងៃប្រហែលជាវែងឆ្ងាយ ប៉ុន្តែរាល់ពេលដែល គឹមហុង ដើរចូលទៅក្នុងថ្នាក់រៀន គេកំពុងបោះជំហានមួយទៀតខិតទៅជិតក្តីស្រមៃបច្ចេកវិទ្យារបស់គេហើយ។

ភ្នំពេញ៖

រៀងរាល់ពេលរសៀល ក្រោមម្លប់ដើមឈើនៅមណ្ឌលសិក្សា ស្ទឹងព្រះស្រុក របស់អង្គការ ស៊ីថេប អ្នកអាចឃើញកុមារមួយក្រុមអង្គុយអានសៀវភៅរឿងជាមួយគ្នាយ៉ាងស្ងប់ស្ងាត់។

មុនពេលចាប់ផ្តើមថ្នាក់ភាសាអង់គ្លេស និងកុំព្យូទ័រ ការអានសៀវភៅបានក្លាយជាទម្លាប់ប្រចាំថ្ងៃរបស់ពួកគេ។ សម្រាប់កុមារជាច្រើននៅតាមសហគមន៍ជនបទ សៀវភៅមួយក្បាលមិនមែនគ្រាន់តែជារឿងនិទានប៉ុណ្ណោះទេ ប៉ុន្តែវាជាបង្អួចដែលបើកផ្លូវឱ្យពួកគេបានស្គាល់ពិភពលោកដ៏ធំទូលាយ ជួយជំរុញការស្រមើស្រមៃ បង្កើនទំនុកចិត្ត និងជួយឱ្យពួកគេមើលឃើញឱកាសថ្មីៗសម្រាប់ពេលអនាគត។

ដំណើរការអានដ៏ស្រស់ស្អាតមួយនេះ បានចាប់ផ្តើមពីលោកស្រី ឈិង ម៉ា។

កាលពីឆ្នាំមុន លោកស្រីបានចំណាយពេលបួនសប្តាហ៍ធ្វើការស្ម័គ្រចិត្តនៅមណ្ឌលសិក្សា ស្ទឹងព្រះស្រុក ក្នុងប្រទេសកម្ពុជា ដោយបានដឹកនាំសកម្មភាពសិល្បៈ និងកម្មវិធីអានសៀវភៅជាមួយកុមារ។ លោកស្រីបានលើកទឹកចិត្តឱ្យកុមារជ្រើសរើសសៀវភៅដែលពួកគេចាប់អារម្មណ៍ដោយសេរី ហើយមិនយូរប៉ុន្មាន លោកស្រីក៏បានដឹងថា នៅពេលកុមារទទួលបានឱកាស ពួកគេមានចំណង់ចំណូលចិត្តក្នុងការអានលើសពីអ្វីដែលគេរំពឹងទុក។

មុនពេលត្រឡប់ទៅប្រទេសខ្លួនវិញ លោកស្រី ម៉ា បានបរិច្ចាគសៀវភៅប្រមាណ ៥០០ ក្បាល និងបានបង្កើតបណ្ណាល័យតូចមួយនៅមណ្ឌលសិក្សា ស្ទឹងព្រះស្រុក។ លោកស្រីសង្ឃឹមថា កុមារមិនត្រឹមតែអាចអានសៀវភៅនៅមណ្ឌលសិក្សាប៉ុណ្ណោះទេ ប៉ុន្តែថែមទាំងអាចយកសៀវភៅដែលពួកគេចូលចិត្តទៅអាននៅផ្ទះផងដែរ ដើម្បីឱ្យភាពរីករាយនៃការអានបន្តលើសពីនៅក្នុងថ្នាក់រៀន។

ដោយដឹងថា កុមារជាច្រើននៅតាមសហគមន៍ជនបទមានសៀវភៅតិចតួចបំផុតនៅផ្ទះ លោកស្រីមិនដែលតម្រូវឱ្យពួកគេយកសៀវភៅមកប្រគល់វិញឡើយ។ ផ្ទុយទៅវិញ លោកស្រីសង្ឃឹមថា សៀវភៅដែលកុមារស្រឡាញ់មួយក្បាលអាចស្ថិតនៅជាមួយពួកគេ និងធ្វើឱ្យការអានក្លាយជាផ្នែកមួយនៃជីវិតប្រចាំថ្ងៃរបស់គ្រួសារ។

នៅពេលបានឃើញថា កុមារចូលចិត្តការអានកាន់តែខ្លាំង លោកស្រី ម៉ា បានសម្រេចចិត្តបរិច្ចាគសៀវភៅបន្ថែមចំនួន ៥២០ ក្បាលក្នុងឆ្នាំនេះ ដើម្បីពង្រីកគម្រោងលើកកម្ពស់ការអាននេះទៅកាន់មណ្ឌលសិក្សា ស៊ីថេប ចំនួន ៤ កន្លែងបន្ថែមទៀត គឺនៅមណ្ឌលសិក្សា ប្រវ៉ាល, តាយ៉ែក, តាស្នែ និង ប្រាសាទធ្នង់។ មណ្ឌលសិក្សា ស្ទឹងព្រះស្រុក ទទួលបានសៀវភៅបន្ថែមចំនួន ១០០ ក្បាល ខណៈដែលមណ្ឌលសិក្សាបួនផ្សេងទៀត ទទួលបានចំនួន ១០៥ ក្បាលសម្រាប់មណ្ឌលនីមួយៗ។

សៀវភៅថ្មីៗទាំងនេះ រួមមានសៀវភៅរឿង សៀវភៅចំណេះដឹងទូទៅ សៀវភៅប្រវត្តិសាស្ត្រ សៀវភៅអប់រំ និងសៀវភៅអភិវឌ្ឍន៍ខ្លួន ដែលផ្តល់ឱ្យកុមារនូវឱកាសក្នុងការស្វែងយល់ពីចំណេះដឹងជាច្រើនសម្បូរបែប ស្របតាមចំណាប់អារម្មណ៍របស់ពួកគេ។

ការអានផ្តល់ឱ្យកុមារច្រើនជាងចំណេះដឹង។ វាជួយអភិវឌ្ឍការស្រមើស្រមៃ ពង្រឹងសមត្ថភាពគិតវិភាគ បង្កើនទំនុកចិត្ត និងជំរុញឱ្យពួកគេជឿជាក់ថា ពួកគេអាចបង្កើតអនាគតដ៏ភ្លឺស្វាងសម្រាប់ខ្លួនឯងបាន។

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះលោកស្រី ឈិង ម៉ា សម្រាប់ការគាំទ្រដោយមិនមានការុញរាចំពោះវិស័យអប់រំនៅតាមសហគមន៍ជនបទក្នុងប្រទេសកម្ពុជា។ ដោយសារសេចក្តីសប្បុរស និងការយកចិត្តទុកដាក់របស់លោកស្រី កុមារកាន់តែច្រើនកំពុងស្វែងរកឃើញភាពរីករាយក្នុងការអាន និងជឿជាក់ថា ពួកគេអាចឈានទៅមុខបានឆ្ងាយជាងអ្វីដែលពួកគេធ្លាប់ស្រមៃ។

ភ្នំពេញ៖

នៅតាមមជ្ឈមណ្ឌលសិក្សាជនបទរបស់ អង្គការស៊ីថេប ថ្នាក់រៀនកុំព្យូទ័រមិនមែនគ្រាន់តែបង្រៀនសិស្សឱ្យចេះប្រើប្រាស់កុំព្យូទ័រប៉ុណ្ណោះទេ​ ប៉ុន្តែពួកយើងខិតខំប្រឹងប្រែងបង្កើតសកម្មភាពសិក្សាថ្មីៗនៅក្នងថ្នាក់រៀន ដើម្បីបង្កើនបរិយាកាសការសិក្សារៀនសូត្រ មានភាពសប្បាយរីករាយ ទាក់ទាញ និងការលើកទឹកចិត្ត ដើម្បីឱ្យសិស្សអាចអភិវឌ្ឍជំនាញជំនាញតាមប្រព័ន្ធអនឡាញ និងបង្កើនទំនុកចិត្តលើការរៀនសូត្ររបស់ខ្លួន។

ដើម្បីធ្វើឱ្យមេរៀនកាន់តែមានប្រសិទ្ធភាពនិងសកម្ម លោកគ្រូអ្នកគ្រូបង្រៀនរបស់អង្គការស៊ីថេប បានដាក់បញ្ចូលសកម្មភាពជាច្រើនមានដូចជា ការចូលរួមជាក្រុម ការអនុវត្តផ្ទាល់ និងការលេងហ្គេមអប់រំទៅក្នុងការបង្រៀនផងដែរ។ សកម្មភាពមួយដែលលោកគ្រូអ្នកគ្រូបានយកមកប្រើប្រាស់គឺ Kahoot! ដែលជាកម្មវិធីសិក្សាតាមរយៈការលេងហ្គេម។ Kahoot! ជាប្រភេទហ្គេមសម្រាប់ ការប្រកួតចំណេះដឹងដ៏រីករាយ និងទាក់ទាញការចាប់អារម្មណ៍របស់កូនសិស្សកំពុងរៀននៅក្នុងថ្នាក់ ​ម្យ៉ាងវិញទៀតអាចជួយអោយសិស្សទទួលបានចំណេះដឹងពីការរំលឹកមេរៀនតាមរយះហ្គេមនេះផងដែរ។ ខណៈពេលដែលពួកគេប្រកួតប្រជែងសមត្ថភាពក្នុងការឆ្លើយសំណួរជាមួយមិត្តរួមថ្នាក់ ព្រមទាំងអបអរសាទរលើកទឹកចិត្តចំពោះអ្នកដែលទទួលបានជ័យលាភី ក្នុងការលេងហ្គេមនេះ។

តាមរយៈវិធីសាស្ត្របង្រៀនទាំងនេះ សិស្សមានការចូលរួមកាន់តែសកម្មនៅក្នុងថ្នាក់រៀន ហើយអាចអភិវឌ្ឍជំនាញក្នុងការដោះស្រាយបញ្ហា ការធ្វើការងារជាក្រុម និងជំនាញតាមប្រព័ន្ធអនឡាញ ផ្អែកលើការសិក្សារបស់ពួកគេផ្ទាល់។

អង្គការស៊ីថេប ជឿជាក់ថា ការអប់រំមិនមែនគ្រាន់តែជាការផ្ទេរចំណេះដឹងប៉ុណ្ណោះទេ ប៉ុន្តែជាការបំផុសគំនិតឱ្យសិស្សស្រឡាញ់ការសិក្សារៀនសូត្រ និងការត្រៀមលក្ខណៈជាស្រេចដើម្បីឱ្យសិស្សានុសិស្សសម្របខ្លួនតាមបច្ចេកវិទ្យាដែលមានភាពរីកចម្រើននាពេលអនាគត។

ភ្នំពេញ៖

ក្នុងវ័យ ១១ ឆ្នាំ កុមារភាគច្រើនចំណាយពេលទំនេររបស់ពួកគេក្នុងការលេងកម្សាន្ត និងភាពរីករាយនឹងជីវិតកុមារភាពរបស់ពួកគេ។ ប៉ុន្តែសម្រាប់កុមារី គរ បញ្ញាពេជ្រ នាងតែងតែគិតគូរពីរបៀបដែលអាចជួយសម្រាលបន្ទុកគ្រួសាររបស់នាងបាន។

នាង រស់នៅជាមួយម្តាយដែលជាស្រ្តីម៉េម៉ាយ រួមជាមួយលោកយាយដែលមានវ័យចាស់ជរា និងប្អូនស្រីតូចម្នាក់។ ម្តាយរបស់នាងធ្វើការជាកម្មករស៊ីឈ្នួលប្រចាំថ្ងៃ ដោយទទួលធ្វើគ្រប់ការងារទាំងឡាយណាដែលគាត់អាចរកបានប្រាក់កម្រៃដើម្បីចិញ្ចឹមគ្រួសារ។ ការធំដឹងក្តីក្នុងស្ថានភាពបែបនេះ បានធ្វើឱ្យនាង រៀនសូត្រដឹងតាំងពីតូចមកថា រាល់ប្រាក់មួយរៀលៗដែលគ្រួសារនាងរកបាន គឺសុទ្ធតែបានមកពីការងារលំបាក។

ក្រោយចេញពីសាលារៀន នាងបានជួយធ្វើការងារស្រាលៗនៅហាងមួយក្នុងភូមិ ដើម្បីរកប្រាក់កាសបន្តិចបន្តួច។ នាងក៏បានជិះកង់ទៅសាលារៀនជារៀងរាល់ថ្ងៃ និងបានខ្ចប់បាយពីផ្ទះទៅញ៉ាំ ដោយសង្ឃឹមថានឹងអាចជួយសន្សំសំចៃថវិការបស់គ្រួសារបានខ្លះ តាមអ្វីដែលនាងអាចធ្វើបាន។ ទោះបីជាជម្រើសទាំងនេះមើលទៅហាក់បីដូចជារឿងតូចតាច ប៉ុន្តែវាបានឆ្លុះបញ្ចាំងពីការយល់ដឹង និងភាពចាស់ទុំហួសពីវ័យរបស់នាងយ៉ាងខ្លាំង។

ទោះបីជាមានទំនួលខុសត្រូវទាំងនេះក៏ដោយ ក៏នាងមិនដែលបោះបង់ការសិក្សានោះឡើយ។

នាងជឿជាក់ថាការអប់រំគឺជាគន្លឹះទៅកាន់អនាគតដ៏ល្អប្រសើរ។ រៀងរាល់រសៀល នាងតែងតែមកកាន់មជ្ឈមណ្ឌលសិក្សា ដានរុន របស់អង្គការ ស៊ីថេប ដើម្បីរៀនភាសាអង់គ្លេស ដោយចាប់យកគ្រប់កំរិតសៀវភៅសិក្សាទាំងអស់ ដើម្បីមានឱកាសរៀនសូត្រពីសៀវភៅទាំងអស់នោះ។ នាងដឹងថាការខិតខំប្រឹងប្រែងរៀនសូត្រនៅថ្ងៃនេះ មិនមែនសម្រាប់តែខ្លួនឯងនោះទេ ប៉ុន្តែក៏ជាវិធីមួយដើម្បីបង្កើតអនាគតដ៏ល្អប្រសើរសម្រាប់គ្រួសាររបស់នាងផងដែរ។

សម្រាប់លោកគ្រូអ្នកគ្រូ នាងគឺជាសិស្សម្នាក់ដែលចេះគួរសម មានចិត្តសប្បុរស និងខិតខំប្រឹងប្រែងរៀនសូត្រ នាងតែងតែបំពេញរាល់កិច្ចការសាលាដោយយកចិត្តទុកដាក់ តែងតែរីករាយក្នុងការជួយមិត្តរួមថ្នាក់ និងកម្រនឹងឃើញនាងគ្មានស្នាមញញឹមដ៏កក់ក្តៅនៅលើផ្ទៃមុខណាស់។

បញ្ញាពេជ្រ មានក្តីស្រមៃចង់ក្លាយជាគ្រូបង្រៀនភាសាអង់គ្លេសនៅថ្ងៃណាមួយ។

នាងជឿជាក់ថា ការអប់រំគឺមានតម្លៃលើសពីការរៀនភាសា ពោលគឺវាបើកទ្វារទៅរកឱកាសថ្មីៗ និងនាំមកនូវសេចក្តីសង្ឃឹមសម្រាប់អនាគតដ៏ភ្លឺស្វាង។ ថ្ងៃណាមួយ នាងសង្ឃឹមថានឹងអាចចែករំលែកអ្វីដែលនាងបានរៀនសូត្រទៅកាន់កុមារដទៃទៀត ដោយបញ្ជូនបន្តនូវឱកាសដូចគ្នាដែលកំពុងជួយកែប្រែជីវិតរបស់នាងនាពេលបច្ចុប្បន្ន។

នៅអង្គការ ស៊ីថេប យើងជឿជាក់ថាកុមារគ្រប់រូបសុទ្ធតែមានសក្តានុពលមិនចេះរីងស្ងួត។ នៅពេលដែលកុមារមានឆន្ទៈខិតខំប្រឹងប្រែង ហើយមានមនុស្សដែលមានចិត្តសប្បុរសជ្រោមជ្រែងឈរក្បែរពួកគេ ការអប់រំនឹងក្លាយជាកម្លាំងចលករដ៏មានឥទ្ធិពលដែលអាចផ្លាស់ប្តូរជីវិតបាន។

សូមថ្លែងអំណរគុណដល់អ្នកគាំទ្រគ្រប់រូប ដែលបានដើរទន្ទឹមគ្នាជាមួយសិស្សានុសិស្សរបស់យើង និងជួយឱ្យពួកគេឈានជើងមួយជំហានខិតទៅជិតអនាគតដ៏ភ្លឺស្វាង។

#ស៊ីថេប #ការអប់រំនៅជនបទ #ការអប់រំផ្លាស់ប្តូរជីវិត #កម្ពុជា #ស្រមៃឱ្យខ្ពស់

ភ្នំពេញ៖

ជារៀងរាល់ថ្ងៃបន្ទាប់ពីចេញពីសាលារៀន កុមារី ភីឡៃ អាយុ ១០ ឆ្នាំ ជិះកង់មករៀននៅមណ្ឌលសិក្សាជនបទថ្នល់របស់អង្គការ ស៊ីថេប។

ឪពុកម្តាយរបស់ ភីឡៃ ធ្វើការនៅឆ្ងាយពីផ្ទះ។ ឪពុករបស់នាងធ្វើការនៅចម្ការស្វាយចន្ទី ខណៈម្តាយរបស់នាងធ្វើការនៅរោងចក្រមួយកន្លែងដែលនៅខេត្តឆ្ងាយ។ ភីឡៃ រស់នៅជាមួយជីដូនជីតា និងប្អូនប្រុសៗរបស់នាង តាំងពីនាងនៅតូចមកម្ល៉េះ។ ទោះបីជាក្រុមគ្រួសារត្រូវរស់នៅឆ្ងាយពីគ្នាជាញឹកញាប់ក៏ដោយ ក៏ម្តាយរបស់នាងមិនដែលឈប់យកចិត្តទុកដាក់ចំពោះការសិក្សារបស់កូនស្រីឡើយ។

នៅពេលសម្រាកពីការងារ ម្តាយរបស់នាងតែងតែទូរស័ព្ទ និងផ្ញើសារតាម ហ្វេសប៊ុក ដើម្បីសួរសុខទុក្ខគ្រួសារ និងតាមដានការសិក្សារបស់ ភីឡៃ។

សំណួរដែលគាត់តែងតែសួរញឹកញាប់ជាងគេ គឺមិនមែនសួរថា “តើថ្ងៃនេះបានពិន្ទុប៉ុន្មាន?” នោះទេ ប៉ុន្តែគឺជាសំណួរដែលសួរថា “តើថ្ងៃនេះកូនបានរៀនអ្វីខ្លះ?”

គាត់តែងតែលើកទឹកចិត្តកូនស្រីឱ្យបន្តរៀន និងរំលឹកនាងជាញឹកញាប់ថា៖

“កុំបារម្ភថាត្រូវរៀនឱ្យចេះគ្រប់យ៉ាងក្នុងពេលតែមួយ។ គ្រាន់តែអភិវឌ្ឍខ្លួនបន្តិចម្តងៗរាល់ថ្ងៃ យូរៗទៅ កូននឹងឃើញថាខ្លួនឯងរីកចម្រើនបានច្រើនប៉ុណ្ណា។”

ដោយធ្លាប់ឆ្លងកាត់ការលំបាកក្នុងការងាររោងចក្រដោយខ្លួនឯង ម្តាយរបស់ភីឡៃយល់ច្បាស់ពីតម្លៃនៃការអប់រំ។ គាត់សង្ឃឹមថា តាមរយៈការសិក្សា និងការអភិវឌ្ឍជំនាញជាក់ស្តែង កូនស្រីរបស់គាត់នឹងមានឱកាស និងជម្រើសកាន់តែច្រើនសម្រាប់អនាគត។

ភីឡៃ បានចងចាំពាក្យទាំងនេះជាប់ក្នុងចិត្តរបស់នាងជានិច្ច។

នាងយល់ពីការលះបង់របស់ឪពុកម្តាយដែលត្រូវទៅធ្វើការឆ្ងាយពីផ្ទះ និងដឹងថាម្តាយរបស់នាងមានក្តីសង្ឃឹមយ៉ាងខ្លាំងចំពោះអនាគតរបស់នាង។ ដោយសារតែបែបនេះ នាងឱ្យតម្លៃខ្ពស់ចំពោះគ្រប់ឱកាសក្នុងការសិក្សា។ នាងចូលរៀនទៀងទាត់ បំពេញកិច្ចការសិក្សារបស់ខ្លួន និងខិតខំប្រឹងប្រែងឱ្យអស់ពីសមត្ថភាព ដើម្បីជាការតបស្នងចំពោះការខិតខំរបស់ម្តាយ។

នៅក្នុងសហគមន៍ជនបទជាច្រើន ឪពុកម្តាយត្រូវចាកចេញពីផ្ទះដើម្បីរកប្រាក់ចំណូល និងផ្គត់ផ្គង់គ្រួសារ។ ប៉ុន្តែអ្វីដែលជួយកំណត់អនាគតរបស់កុមារ មិនមែនមានតែការគាំទ្រផ្នែកហិរញ្ញវត្ថុប៉ុណ្ណោះទេ ប៉ុន្តែក៏មានការលើកទឹកចិត្ត ការណែនាំ និងជឿជាក់ថា ការអប់រំអាចបើកទ្វារទៅរកឱកាសថ្មីៗផងដែរ។

នៅពេលដែល ភីឡៃ ជិះកង់ទៅកាន់មណ្ឌលសិក្សារៀងរាល់ថ្ងៃ នាងតែងនឹកឃើញដល់ដំបូន្មានដ៏សាមញ្ញរបស់ម្តាយថា៖

“អភិវឌ្ឍខ្លួនបន្តិចម្តងៗរាល់ថ្ងៃ។”

ហើយការលើកទឹកចិត្តពីចម្ងាយនេះ នៅតែបន្តជំរុញឱ្យនាងរៀនសូត្រ រីកចម្រើន និងបន្តដើរទៅមុខ។

ភ្នំពេញ៖

កាលពីខែមុន ក្នុងអំឡុងពេលចូលរួមកម្មវិធីមួយនៅតាមខេត្ត យើងបានជួបនារីវ័យក្មេងម្នាក់ដែលពោរពេញដោយទំនុកចិត្ត និងកំពុងជាតំណាងឱ្យក្រុមហ៊ុនរបស់នាង។ នាងអាចនិយាយភាសាអង់គ្លេសបានយ៉ាងស្ទាត់ជំនាញ មានអាកប្បកិរិយាប្រកបដោយវិជ្ជាជីវៈ និងជាសមាជិកដ៏មានតម្លៃម្នាក់នៅក្នុងក្រុមការងាររបស់នាងផងដែរ។

នៅពេលជជែកគ្នា យើងមានការភ្ញាក់ផ្អើលយ៉ាងខ្លាំង នៅពេលដឹងថា នាងគឺជាអតីតសិស្សម្នាក់ដែលធ្លាប់បានចូលរៀនថ្នាក់កុំព្យូទ័រនៅមណ្ឌលសិក្សា ថ្នល់ របស់អង្គការ ស៊ីថេប កាលពីជាង ១០ ឆ្នាំមុន។

នាងមានប្រវត្តិមកពីគ្រួសារកសិករមួយនៅជនបទក្នុងខេត្តសៀមរាប។ កាលនៅរៀនថ្នាក់អនុវិទ្យាល័យ នាងបានស្គាល់កុំព្យូទ័រជាលើកដំបូងតាមរយៈមណ្ឌលសិក្សា ថ្នល់ របស់អង្គការ ស៊ីថេប។ នៅទីនោះ នាងបានរៀនជំនាញកុំព្យូទ័រមូលដ្ឋានគ្រឹះ ដែលមានដូចជាកម្មវិធី Microsoft Word, Excel និង PowerPoint។ ទោះបីជាឱកាសទាំងនេះអាចជារឿងធម្មតាសម្រាប់សិស្សជាច្រើននៅទីក្រុងក៏ដោយ ប៉ុន្តែសម្រាប់នាង វាបានបើកផ្លូវទៅកាន់ពិភពលោកដ៏ធំទូលាយមួយ។

សព្វថ្ងៃនេះ នាងបានបញ្ចប់ការសិក្សាទាំងថ្នាក់បរិញ្ញាបត្រ និងថ្នាក់អនុបណ្ឌិតដោយជោគជ័យ ហើយកំពុងកសាងអាជីពដ៏មានសក្តានុពលមួយនៅរាជធានីភ្នំពេញ។

នាងបានចែករំលែកជាមួយយើងថា៖

"ស៊ីថេប បានផ្តល់ឱកាសឱ្យខ្ញុំរៀនជំនាញកុំព្យូទ័រដោយមិនគិតថ្លៃ។ វាបានជួយបង្កើនទំនុកចិត្តក្នុងការសិក្សារបស់ខ្ញុំ និងជួយឱ្យខ្ញុំអាចដើរទាន់សិស្សដទៃទៀត។"

សម្រាប់ពួកយើង តម្លៃពិតប្រាកដនៃការអប់រំ មិនមែនស្ថិតត្រឹមតែចំណេះដឹងដែលទទួលបាននៅក្នុងថ្នាក់រៀនប៉ុណ្ណោះទេ ប៉ុន្តែថែមទាំងអាចឃើញយុវជនជាច្រើនឆ្នាំក្រោយៗ មានសមត្ថភាពក្នុងការជ្រើសរើសអនាគតរបស់ខ្លួនឯងបានផងដែរ។

យើងសូមថ្លែងអំណរគុណយ៉ាងជ្រាលជ្រៅដល់ដៃគូ និងអ្នកគាំទ្រទាំងអស់របស់ ស៊ីថេប។ ដោយសារសេចក្តីសប្បុរសរបស់អ្នកទាំងអស់គ្នា កុមារនៅតាមសហគមន៍ជនបទមានឱកាសទទួលបានធនធានអប់រំ អភិវឌ្ឍជំនាញដ៏មានតម្លៃ និងមានផ្លូវឆ្ពោះទៅកាន់អនាគតដ៏ភ្លឺស្វាង។

#ស៊ីថេប #ការអប់រំនៅជនបទ #ការអប់រំផ្លាស់ប្តូរជីវិត #ពីមណ្ឌលសិក្សាទៅកាន់អាជីពការងារ

ភ្នំពេញ៖

នៅក្នុងការអប់រំ គ្រូបង្រៀនមិនត្រឹមតែជាអ្នកផ្តល់ចំណេះដឹងប៉ុណ្ណោះទេ ប៉ុន្តែក៏ជាអ្នកណែនាំដ៏សំខាន់ ដែលអាចជួយកុមារកសាងទំនុកចិត្ត និងស្វែងរកអនាគតរបស់ពួកគេផងដែរ។

អស់រយៈពេលជាច្រើនឆ្នាំ ស៊ីថេប តែងតែជឿជាក់ថា គ្រូបង្រៀនដែលមានការលះបង់ អាចបង្កើតឥទ្ធិពលដ៏យូរអង្វែងលើជីវិតរបស់កុមារ។ ដូច្នេះ រៀងរាល់ឆ្នាំ យើងតែងតែធ្វើការជ្រើសរើសគ្រូឆ្នើម ចំពោះការខិតខំប្រឹងប្រែង ការប្តេជ្ញាចិត្ត និងឥទ្ធិពលវិជ្ជមានរបស់ពួកគាត់ក្នុងវិស័យអប់រំ ព្រមទាំងសម្តែងការដឹងគុណចំពោះការលះបង់អស់រយៈពេលជាច្រើនឆ្នាំរបស់ពួកគាត់ចំពោះសហគមន៍ជនបទ។

ក្នុងឆ្នាំ ២០២៦ នេះ អង្គការស៊ីថេប បានជ្រើសរើសគ្រូបង្រៀនឆ្នើមចំនួន ២ រូប៖

គ្រូបង្រៀនឆ្នើមថ្នាក់ភាសាអង់គ្លេស លោកគ្រូ ជុំ សុខុម

គ្រូបង្រៀនឆ្នើមថ្នាក់កុំព្យូទ័រ និង ថ្នាក់សរសេរកូដ លោកគ្រូ ហេង សំរេច

ខាងក្រោមនេះគឺជារឿងរ៉ាវដែលជំរុញទឹកចិត្តពីគ្រូបង្រៀនទាំងពីររូប៖

ការកសាងទំនុកចិត្តសិស្សតាមរយៈការលើកទឹកចិត្ត លោកគ្រូភាសាអង់គ្លេស ជុំ សុខុម

លោកគ្រូ ជុំ សុខុម ជាគ្រូបង្រៀននៅមណ្ឌលសិក្សាជនបទតាស្នែ ដែលមានបទពិសោធន៍បង្រៀនជាង ១០ ឆ្នាំ អស់រយៈពេលជាច្រើនឆ្នាំកន្លងមក លោកគ្រូតែងតែបង្រៀនសិស្សដោយមានភាពអត់ធ្មត់ ដោយក្តីស្រឡាញ់ក្នុងការបង្រៀន និងមានទំទួលខុសត្រូវខ្ពស់។

សម្រាប់លោកគ្រូ សុខុម ភាសាអង់គ្លេសមិនមែនគ្រាន់តែជាមុខវិជ្ជាមួយនៅក្នុងសាលាប៉ុណ្ណោះទេ ប៉ុន្តែជាជំនាញដ៏សំខាន់ ដែលអាចជួយកុមារទទួលបានឱកាសនាពេលអនាគតរបស់ពួកគេ។ នៅក្នុងថ្នាក់រៀន លោកគ្រូតែងតែផ្តោតសំខាន់ទៅលើការចូលរួម និងការទំនាក់ទំនងរបស់សិស្ស តាមរយៈសកម្មភាពជាក្រុម ល្បែងកម្សាន្តដែលទាក់ទងជាមួយមេរៀន ស្វ័យសិក្សា និងការសន្ទនាប្រចាំថ្ងៃ ដើម្បីបង្កើតបរិយាកាសសិក្សាដែលមានភាពសប្បាយរីករាយ។

សិស្សជាច្រើនដែលធ្លាប់តែខ្មាស់អៀន និងខ្លាចការនិយាយភាសាអង់គ្លេស បានក្លាយជាសិស្សដែលមានទំនុកចិត្តបន្តិចម្តងៗ ដោយសារការលើកទឹកចិត្ត និងការគាំទ្រជាបន្តបន្ទាប់ពីលោកគ្រូ។

ក្រៅពីការបង្រៀនក្នុងថ្នាក់ លោកគ្រូ សុខុម ក៏បានយកចិត្តទុកដាក់យ៉ាងខ្លាំងចំពោះការរីកចម្រើននៃការសិក្សារបស់សិស្សម្នាក់ៗផងដែរ។ នៅពេលសិស្សជួបការលំបាក លោកគ្រូតែងតែមានឆន្ទៈក្នុងការជួយបណ្តោះបណ្តាលសិក្សានុសិស្សបន្ថែម និងលើកទឹកចិត្តឱ្យពួកគេកុំខ្លាចក្នុងការធ្វើខុស ប៉ុន្តែត្រូវបន្តការព្យាយាម និងអភិវឌ្ឍខ្លួនជានិច្ច។

ភាពអត់ធ្មត់ និងការលះបង់របស់លោកគ្រូ មិនត្រឹមតែជួយអភិវឌ្ឍសមត្ថភាពភាសាអង់គ្លេសរបស់សិស្សប៉ុណ្ណោះទេ ប៉ុន្តែក៏ជាឱកាសមួយបានជួយឱ្យកុមារជាច្រើនជឿជាក់ថា ពួកគេអាចសម្រេចបានច្រើនជាងអ្វីដែលពួកគេ គិត។

ការជំរុញលើកទឹកចិត្តឱ្យសិស្សស្រឡាញ់ក្នុងការសរសេរកូដ លោកគ្រូថ្នាក់កុំព្យូទ័រ និង ថ្នាក់សរសេរកូដ ហេង សំរេច

លោកគ្រូ ហេង សំរេច ជាគ្រូបង្រៀននៅមណ្ឌលសិក្សាជនបទរកា និងជាគ្រូបង្រៀនថ្នាក់កុំព្យូទ័រ និង ថ្នាក់សរសេរកូដ ដែលសិស្សជាច្រើនចូលចិត្តការបង្រៀនរបស់គាត់។ ជាមួយបទពិសោធន៍បង្រៀនអស់រយៈពេល ៣ ឆ្នាំ លោកគ្រូមានជំនាញក្នុងការពន្យល់មេរៀន ការសរសេរកូដ ដែលពិបាកៗ ឱ្យក្លាយជាមេរៀនដែលមានភាពងាយស្រួល និងគួរឱ្យចាប់អារម្មណ៍។

នៅក្នុងថ្នាក់រៀន លោកគ្រូផ្តោតសំខាន់ទៅលើការអនុវត្តផ្ទាល់ ដោយអនុញ្ញាតឱ្យសិស្សយល់ពីគោលការណ៍ ថ្នាក់សរសេរកូដ តាមរយៈការអនុវត្ត និងសកម្មភាពជាក់ស្តែង ជាជាងគ្រាន់តែស្តាប់ការពន្យល់ប៉ុណ្ណោះ។

ទោះបីជាពេលខ្លះមានបញ្ហាកើតឡើងនៅក្នុងថ្នាក់រៀន ដូចជាការខូចឧបករណ៍បច្ចេកទេសយ៉ាងណាក៏ដោយ លោកគ្រូតែងតែអាចដោះស្រាយបញ្ហាបានយ៉ាងឆាប់រហ័ស។ ក្នុងមេរៀនមួយ នៅពេលម៉ាស៊ីនបញ្ចាំងរូបភាព ឈប់ដំណើរការ លោកគ្រូ សំរេច បានប្តូរទៅបង្រៀនលើក្តារខៀនភ្លាមៗ និងពន្យល់មេរៀនគ្រប់ជំហានយ៉ាងលម្អិត ដើម្បីឱ្យសិស្សអាចបន្តការសិក្សាបានដោយមិនមានការរំខាន។

ការទទួលខុសត្រូវ និងការលះបង់ដ៏រឹងមាំនេះ បានជះឥទ្ធិពលយ៉ាងខ្លាំងដល់សិស្សរបស់លោកគ្រូ។

លោកគ្រូ សំរេច តែងតែលើកទឹកចិត្តសិស្សឱ្យហ៊ានសាកល្បង កុំខ្លាចបរាជ័យ និងបន្តរៀនពីកំហុស។ នៅពេលដែលសិស្សមានការលំបាក លោកគ្រូតែងតែចំណាយពេលបន្ថែម ដើម្បីរកវិធីសាស្រ្តបង្រៀនណែនាំពួកគេរហូតដល់យល់ច្បាស់ពីខ្លឹមសារនៃមេរៀន។

ក្រោមការណែនាំរបស់លោកគ្រូ សិស្សជាច្រើនបានអភិវឌ្ឍសមត្ថភាពរបស់ខ្លួននឹងមានចំណាប់អារម្មណ៍យ៉ាងខ្លាំងលើបច្ចេកវិទ្យា និង ការសរសេរកូដ។ សិស្សម្នាក់របស់លោកគ្រូទទួលបានចំណាត់ថ្នាក់លេខ ១ ក្នុងកម្មវិធីប្រកួតប្រជែងសិស្សពូកែប្រចាំ ឆ្នាំ ២០២៥ ដែលបង្ហាញពីលទ្ធផលនៃការលះបង់របស់គ្រូ និងការខិតខំរបស់សិស្ស។

ការទទួលស្គាល់ និងការលើកទឹកចិត្ត

បន្ថែមពីលើការទទួលស្គាល់គ្រូបង្រៀនឆ្នើម ទាំងនេះអង្គការស៊ីថេប​ក៏សូមថ្លែងអំណរគុណដល់លោកគ្រូអ្នកគ្រូបង្រៀនទាំងអស់ ដែលបន្តបំពេញតួនាទីការងារដោយយកចិត្តទុកដាក់និងមានភាពស្មោះត្រង់នៅក្នុងវិស័យអប់រំ។

យើងជឿជាក់ថា ការអប់រំដែលមានអត្ថន័យពិតប្រាកដ កើតចេញពីគ្រូបង្រៀនដែលមានឆន្ទៈក្នុងការយកចិត្តទុកដាក់ ភាពអត់ធ្មត់ និងដើរជាមួយសិស្សដោយភាពស្មោះស្ម័គ្រពេញមួយដំណើរការសិក្សារបស់ពួកគេ។

គ្រូបង្រៀនដែលមានការលះបង់គ្រប់រូប មានអំណាចក្នុងការផ្លាស់ប្តូរជីវិតកុមារ និងនាំមកនូវក្តីសង្ឃឹម និងឱកាសកាន់តែប្រសើរសម្រាប់សហគមន៍ជនបទ។

ភ្នំពេញ៖

ក្រោយឆ្លងកាត់ការសិក្សា និងការអភិវឌ្ឍខ្លួនអស់រយៈពេល៦ខែមកនេះ មណ្ឌលសិក្សា ខេ ឌី អឹម អ នៅក្នុងខេត្តស្វាយរៀង បានបញ្ចប់កម្មវិធីសិក្សាសម្រាប់វគ្គទី១ របស់ខ្លួនក្នុងខែឧសភា និងបានរៀបចំពិធីបិទវគ្គសិក្សាលើដំបូង កាលពីថ្ងៃទី១៧ ខែឧសភា កន្លងទៅថ្មីៗនេះ។ កម្មវិធីនេះត្រូវបានប្រារព្ធឡើងដើម្បីអបអរសាទរចំពោះសមិទ្ធផលរបស់សិស្សានុសិស្ស និងថ្លែងអំណរគុណដល់សហគមន៍មូលដ្ឋានសម្រាប់ការគាំទ្រយ៉ាងពេញទំហឹងនាពេលកន្លងមក។

មណ្ឌលសិក្សា ខេ ឌី អឹម អ ត្រូវបានឧបត្ថម្ភគាំទ្រដោយក្រុមហ៊ុន ខេ ឌី អឹម អ ស្ព័ត ឯ​.ក​ និងដឹកនាំដំណើរការដោយ​ ស៊ីថេប នៅក្នុងសាលាអនុវិទ្យាល័យឈើទាល។ ដោយសារតែកង្វះខាតធនធានអប់រំផ្នែកភាសាអង់គ្លេស និងកុំព្យូទ័រនៅក្បែរៗនោះ ឱកាសសិក្សារបស់កុមារជាច្រើននៅទីនោះនៅមានកម្រិតនៅឡើយ។ តាមរយៈកម្មវិធីនេះ យើងសង្ឃឹមថានឹងអាចនាំមកនូវឱកាសអប់រំកាន់តែច្រើន និងការផ្លាស់ប្តូរជាផលវិជ្ជមានសម្រាប់សិស្សានុសិស្សនៅក្នុងមូលដ្ឋានមួយនេះ។

ដោយសារនេះជាវគ្គសិក្សាដំបូងនៃការដំណើរការថ្នាក់រៀន យើងក៏បានជួបប្រទះនូវបញ្ហាប្រឈមជាច្រើនផងដែរ។ ដោយមានសិស្សមួយចំនួនត្រូវចូលរៀនបន្ថែមនៅសាលារដ្ឋ គ្រួសារខ្លះនៅមិនទាន់យល់ច្បាស់ពីសារៈសំខាន់នៃការអប់រំ ហើយសិស្សធំៗមួយចំនួនត្រូវមានភារកិច្ចតុល្យភាពរវាងការងារ និងការទទួលខុសត្រូវក្នុងគ្រួសារ ដែលធ្វើឱ្យពួកគេមានការលំបាកក្នុងការមកចូលរៀនឱ្យបានទៀងទាត់។

បទពិសោធន៍ទាំងនេះបានជួយឱ្យយើងយល់កាន់តែច្បាស់អំពីតម្រូវការជាក់ស្តែងរបស់សិស្សក្នុងមូលដ្ឋាន។ ឈានទៅវគ្គថ្មីខាងមុខ យើងនឹងបន្តកែលម្អការរៀបចំថ្នាក់រៀន និងពង្រឹងការប្រស្រ័យទាក់ទងជាមួយសិស្ស និងមាតាបិតា ដើម្បីគាំទ្រដល់ការរៀនសូត្រ និងការរីកចម្រើនប្រកបដោយនិរន្តរភាព។

នៅក្នុងវគ្គសិក្សានេះ ថ្នាក់ភាសាអង់គ្លេស និងកុំព្យូទ័រ មានសិស្សចុះឈ្មោះចូលរៀនសរុបចំនួន ៣១៩ នាក់ ដោយក្នុងនោះមានសិស្សចំនួន ១៩៣ នាក់ បានបញ្ចប់វគ្គសិក្សាដោយជោគជ័យ និងទទួលបានវិញ្ញាបនបត្រ ដែលស្មើនឹងអត្រាបញ្ចប់ការសិក្សាសរុប ៦១%។

ដើម្បីលើកទឹកចិត្តសិស្សានុសិស្សចំពោះការខិតខំប្រឹងប្រែង និងការរីកចម្រើនរបស់ពួកគេ ពិធីបិទវគ្គសិក្សានេះក៏មានរួមបញ្ចូលនូវការផ្តល់លិខិតសរសើរដល់សិស្សានុសិស្ស ការឡើងធ្វើបទបង្ហាញពីលទ្ធផលនៃការសិក្សា ល្បែងកម្សាន្តសប្បាយៗ និងការច្រៀងចម្រៀង ដែលបង្កើតបានជាបរិយាកាសដ៏រីករាយ និងគួរឱ្យចងចាំសម្រាប់អ្នករាល់គ្នា។

ក្រុមហ៊ុន ខេ ឌី អឹម អ ស្ព័ត ឯ​.ក​ ក៏បានផ្តល់រង្វាន់លើកទឹកចិត្តដល់បុគ្គលិកឆ្នើមរបស់ ខេ ឌី អឹម អ ចំនួនពីររូបផងដែរ ដើម្បីជាការកោតសរសើរចំពោះការចូលរួមយ៉ាងសកម្ម និងការបន្តអភិវឌ្ឍសមត្ថភាពខ្លួនក្រៅម៉ោងការងាររបស់ពួកគេ។

កម្មវិធីនេះបានប្រមូលផ្តុំអ្នកចូលរួមសរុបមាន៖ សិស្សានុសិស្សចំនួន ១១១ នាក់ មាតាបិតា ៦៥ នាក់ អាជ្ញាធរមូលដ្ឋាន ១៤ នាក់ ក្រុមការងារគ្រប់គ្រងរបស់ ខេ ឌី អឹម អ ៥ នាក់ និងលោកនាយកសាលា។ ការបានឃើញសិស្សានុសិស្សឡើងធ្វើបទបង្ហាញនៅលើឆាកដោយភាពជឿជាក់ និងស្នាមញញឹមដ៏ស្មោះស្ម័គ្រពីសំណាក់សិស្ស និងមាតាបិតា បានរំលឹកយើងសារជាថ្មីម្តងទៀតអំពីផលប៉ះពាល់វិជ្ជមានដែលការអប់រំអាចនាំមកដល់សហគមន៍។

ស៊ីថេប សូមថ្លែងអំណរគុណយ៉ាងជ្រាលជ្រៅចំពោះ ក្រុមហ៊ុន ខេ ឌី អឹម អ អាជ្ញាធរមូលដ្ឋាន មាតាបិតា សប្បុរសជន លោកគ្រូ-អ្នកគ្រូ និងអ្នកគាំទ្រទាំងអស់ ដែលបានញ៉ាំងឱ្យកម្មវិធីនេះលេចចេញជារូបរាងឡើង និងបានជួយផ្តល់ឱកាសអប់រំកាន់តែច្រើនសម្រាប់សិស្សានុសិស្សនៅតាមជនបទ។

យើងនឹងរួមគ្នាបន្តបង្កើតក្តីសង្ឃឹម និងឱកាសតាមរយៈការអប់រំសម្រាប់សហគមន៍ជនបទបន្តទៅមុខទៀត។

ភ្នំពេញ៖

ចាប់ពីថ្ងៃទី ១ ដល់ថ្ងៃទី ៥ ខែសីហា ក្រុមនិស្សិតស្ម័គ្រចិត្តមកពី សាកលវិទ្យាល័យវេជ្ជសាស្ត្រការពារជាតិ (National Defense Medical University – NDMU) នៃប្រទេសតៃវ៉ាន់ បានមកកាន់ប្រទេសកម្ពុជា ដើម្បីចូលរួមចំណែកជាមួយ ស៊ីថេប ដោយនាំមកនូវចំណេះដឹងអប់រំសុខភាព និងបទពិសោធន៍សិក្សាជាក់ស្តែងជូនដល់លោកគ្រូអ្នកគ្រូ សិស្សានុសិស្ស និងគ្រួសារនៅតាមសហគមន៍ជនបទ។

ចាប់ផ្តើមពីគ្រូបង្រៀន ដើម្បីបន្តចែករំលែកចំណេះដឹង

នៅថ្ងៃទី ១ ខែសីហា ក្រុមស្ម័គ្រចិត្តបានចាប់ផ្តើមកម្មវិធីដោយរៀបចំវគ្គបណ្តុះបណ្តាលពេញមួយថ្ងៃជូនដល់គ្រូបង្រៀនរបស់អង្គការ ស៊ីថេប នៅការិយាល័យ ស៊ីថេប។

វគ្គបណ្តុះបណ្តាលនេះបានផ្តោតលើប្រធានបទសំខាន់ៗ ដូចជា អាហារូបត្ថម្ភ ជំងឺរ៉ាំរ៉ៃ និងការប្រើប្រាស់ AI ក្នុងការអប់រំ។ គ្រូបង្រៀនបានចូលរួមអនុវត្តផ្ទាល់ក្នុងការប្រើប្រាស់ AI ដើម្បីបង្កើតផែនការមេរៀន សន្លឹកកិច្ចការ សំណួរខ្លីៗ សកម្មភាពក្នុងថ្នាក់រៀន និងសម្ភារៈបង្រៀនផ្សេងៗ។

វាមិនមែនគ្រាន់តែជាការបង្រៀនតាមទ្រឹស្តីប៉ុណ្ណោះទេ។ តាមរយៈការអនុវត្តផ្ទាល់ គ្រូបង្រៀនមិនត្រឹមតែបានស្វែងយល់អំពី AI ប៉ុណ្ណោះទេ ប៉ុន្តែថែមទាំងយល់កាន់តែច្បាស់អំពីរបៀបយកឧបករណ៍ទាំងនេះទៅអនុវត្តក្នុងថ្នាក់រៀនរបស់ពួកគេផ្ទាល់ផងដែរ។

នាំយកការអប់រំសុខភាពទៅកាន់មណ្ឌលសិក្សារកា

ចាប់ពីថ្ងៃទី ៣ ដល់ថ្ងៃទី ៥ ខែសីហា ក្រុមស្ម័គ្រចិត្តបានចំណាយពេលរយៈពេលបីថ្ងៃនៅ មណ្ឌលសិក្សារកា របស់អង្គការ ស៊ីថេប ដើម្បីបង្រៀន សិក្សា និងធ្វើសកម្មភាពផ្សេងៗជាមួយសិស្សានុសិស្ស។

មេរៀនបានគ្របដណ្តប់លើប្រធានបទជាច្រើន ដូចជា មុខងារសំខាន់ៗទាំងបីរបស់ធ្មេញ ការយល់ដឹងអំពីអារម្មណ៍ សារធាតុចិញ្ចឹមសំខាន់ៗទាំងប្រាំ ការផ្លាស់ប្តូរនៅវ័យជំទង់ ភ្នែក ជំងឺគ្រុនឈាម ជំងឺទឹកនោមផ្អែម និងសីតុណ្ហភាពរាងកាយ។ ប្រធានបទនីមួយៗត្រូវបានផ្សារភ្ជាប់ទៅនឹងជីវិតប្រចាំថ្ងៃរបស់សិស្សានុសិស្ស ដើម្បីឱ្យពួកគេងាយយល់ និងអាចយកចំណេះដឹងទៅអនុវត្តក្នុងជីវិតប្រចាំថ្ងៃបាន។

តាមរយៈសកម្មភាពដែលគួរឱ្យចាប់អារម្មណ៍ និងវិធីសាស្ត្របង្រៀនដែលមានភាពរស់រវើក ប្រធានបទសុខភាពដែលអាចមើលទៅពិបាកយល់សម្រាប់សិស្ស បានក្លាយជាចំណេះដឹងដែលពួកគេអាចយល់ ពិភាក្សា និងយកទៅចែករំលែកជាមួយគ្រួសារនៅផ្ទះបាន។

លើសពីថ្នាក់រៀន ឈានចូលដល់គ្រួសារ

ក្រុមស្ម័គ្រចិត្តក៏បានចុះជួបសួរសុខទុក្ខ និងធ្វើសកម្មភាពជាមួយគ្រួសារនៅតាមសហគមន៍ជនបទ ដោយធ្វើការពិនិត្យសុខភាព ដូចជា វាស់សម្ពាធឈាម ថ្លឹងទម្ងន់ និងវាស់កម្ពស់ ព្រមទាំងជជែកជាមួយគ្រួសារអំពីរបបអាហារប្រចាំថ្ងៃ និងទម្លាប់នៃការរស់នៅរបស់ពួកគេ។

ចាប់ពីការកាត់បន្ថយការប្រើប្រាស់ អំបិល ស្ករ និងខ្លាញ រហូតដល់ការបរិភោគបន្លែឱ្យបានច្រើន ការហាត់ប្រាណជាប្រចាំ ការពិនិត្យសុខភាពតាមកាលកំណត់ និងការលុបបំបាត់ទឹកដក់ដែលអាចក្លាយជាកន្លែងបង្កាត់ពូជមូស—ទាំងនេះអាចមើលទៅជាការរំលឹកដ៏សាមញ្ញ ប៉ុន្តែវាជាការផ្លាស់ប្តូរជំហានតូចៗដែលអាចចាប់ផ្តើមអនុវត្តបានក្នុងជីវិតប្រចាំថ្ងៃ។

ផលប៉ះពាល់នៃការអប់រំ មិនមែនមានតែនៅក្នុងថ្នាក់រៀននោះទេ។

អ្វីដែលគ្រូបង្រៀនម្នាក់បានរៀន អាចផ្តល់អត្ថប្រយោជន៍ដល់សិស្សមួយថ្នាក់ទាំងមូល។ អ្វីដែលកុមារម្នាក់បានរៀនអំពីទម្លាប់រស់នៅប្រកបដោយសុខភាពល្អ ក៏អាចយកទៅចែករំលែកជាមួយគ្រួសារនៅផ្ទះបានផងដែរ។ ហើយនៅពេលដែល គ្រូបង្រៀន កុមារ និងគ្រួសារ រៀនសូត្រជាមួយគ្នា ផលវិជ្ជមាននោះអាចបន្តពង្រីកទៅដល់សហគមន៍ទាំងមូល។

សូមអរគុណយ៉ាងជ្រាលជ្រៅដល់ ក្រុមនិស្សិតស្ម័គ្រចិត្ត NDMU មកពីប្រទេសតៃវ៉ាន់ ដែលបាននាំយកចំណេះដឹង ក្តីស្រឡាញ់ចំពោះការងារ និងថាមពលវិជ្ជមានមកកាន់ប្រទេសកម្ពុជា។

សូមអរគុណសម្រាប់ការនាំយកការអប់រំសុខភាពមកកាន់ទាំង ថ្នាក់រៀន និងគ្រួសាររបស់យើង។